Düütsche Riekspartei

Vun Wikipedia
Wesseln na: Navigatschoon, Söök

Disambig.svg Dit Woort hett noch annere Bedüden: kiek dorför ünner Freekonservative Partei.

De Düütsche Riekspartei (DRP) weer en rechtsextreme Partei vun de Bundsrepubliek Düütschland, de dat vun 1950 bit 1965 geven hett. Se stünn vör allen den extremen Flögel vun’n Weimarer Konservatismus tonah.

Historie[ännern | Bornkood ännern]

De Düütsche Riekspartei is Anfang vun de 1950er Johren tostannen kamen, as de neddersass’sche Düütsche Riekspartei – en Landsverband vun de Düütschen Konservativen Partei – Düütsche Rechtspartei (DKP-DRP) – mit de blots in Hessen aktiven Natschonaldemokraatschen Partei (NDP) tosdamenleggt weer. De Verenigung vun de beiden Gruppen weer in Kassel.

Bit 1953 weer de DRP in’n düütschen Bundsdag vertreden, vun wegen dat sik ehr en Deel vun de Afordenten vun de Düütschen Rechtspartei anslaten harr. Dorto höör ok de latere DRP- un NPD-Vörsitter Adolf von Thadden. In de Johren 1951 un 1955 is de DRP ok in’n Landdag vun Neddersassen wählt worrn. 1953 geev dat tietwies de Afsicht, en Parteiverbottsverfohren dörtosetten, wat den aver nich inleidt worrn is. De radikalere Sozialistische Reichspartei (SRP) is dorgegen 1952 verboden worrn.

1959 künn de DRP bi de Wahlen to’n Landdag vun Rhienland-Palz mit 5,1 % in’t Landsparlament intehn. Se harr dor blots een Afordenten. De Landsverband is aver 1960 verboden worrn. Bi de Wahlen bleev de Partei tomiest ahn duersomen Spood un hett in de Tiet, as se dat geev, jümmer mehr an Bedüden verloren. In’n November 1964 hett de DRP mit Deelen vun de Samtdüütschen Partei (GDP), mit de 1962 vun Heinrich Fassbender grünnten DNVP un mit de Düütschen Partei (DP) Bremen in Hannober de Natschonaldemokraatsche Partei vun Düütschland (NPD) grünnt. As de NPD sik bi de Wahlen 1965 beter dörsetten künn as de DRP vörher, hett sik de DRp oplöst.

Personen an de Spitz[ännern | Bornkood ännern]

De Grünnen vun de Partei geiht sünners op Alexander Andrae, Dr. Oskar Lutz, Prof. Hans-Bernhard vun Grünberg, Wilhelm Meinberg, Otto Hess, Hans Schikora, Prof. Heinrich Kunstmann un Adolf von Thadden torüch. Disse Lüüd weern to’n gröttsten Deel al vör 1933 Liddmaten vun de Natschonalsozialistischen Düütschen Arbeiterpartei (NSDAP). Wietere bekannte Liddmaten vun de Partei weern de SS-Stormbannföhrer Erich Kernmayr, de natschonalsozialistische Afkaat Friedrich Grimm, de Schriever Hans Grimm („Volk ohne Raum“), de Oberst a.D. vun de Luftwapen Hans-Ulrich Rudel un de Verlegger Karl Waldemar Schütz. De DRP hett sik as Sammlungsbewegen för ehmolige NSDAP-Liddmaten verstahn un as Vertreder för de Intressen vun ehmolige Anhörige vun de Wehrmacht.

Politik[ännern | Bornkood ännern]

As de Naam dat to’n Utdruck bringt, hett de Partei foddert, dat 1867/1871 vun Otto vun Bismarck grünnte Düütsche Riek wedder hertostellen. Dat Deelen vun Düütschland lehn de DRP af. Dat weddervereente Düütschland schüll na de DRP blangen de veer Besattenszonen oder de Bundsrepubliek, SBZ/DDR un Berlin ok de ehmoligen düütschen Oostrebeden ümfaten un free wesen vun frömme Besatters. Jemehr wichtigste Programmpunkt weer dat Wedderbeleven vun’t Düütsche Riek tomindst in de Grenzen vun 1937. Butendem hett sik de DRP för de Intressen vun de düütschen Landweertschop stark maakt, in de sik en groten Deel vun de Wählers anfunnen hett. Ehr Swoorpunkten harr de DRP sünners in Neddersassen un in Rhienland-Palz in de ländlich-evangeelschen Rebeden.

Blangen den Chiliasmus (Rieksdenkern) vun de DRP weer in de Nakriegstiet ok de Antikommunismus en bedüden Element vun de Partei. Bito hett man sik ok gegen dat Oparbeiten vun de verleden Tiet in’n Natschonalsozialismus insett. De Opgaav vun de Fro hett de DRP in de Rull as Mudder sehn un lehn en vullstännige Gliekberechtigung vun de Fronslüüd af. Mehr noch wull de Partei dorför sorgen, dat Fronslüüd blots noch in Nootfäll en Beroop utöven dröffen.[1]

Pateiblatt[ännern | Bornkood ännern]

Dat Blatt för de LIddmaten as plubizistisch Organ vun de DRP weer de Reichsruf.

Wahlen[ännern | Bornkood ännern]

Bundsdagswahl 1953: 295.739 Stimmen, 1,1%
De DRP weer blots in 6 vun 9 Bundslänner antreden.
Bundsdagswahl 1957: 308.564 Stimmen, 1,0% (-0,1)
Bundsdagswahl 1961: 262.977 Stimmen, 0,8% (-0,2)
Bayern
1958: 56.864 Stimmen, 0,6%
Bremen
1959: 14.689 Stimmen, 3,8%
1963: Listenverbinnen mit de Düütschen Partei (DP), 5,1% ( 4 Sitten)
Hamborg
1953: 7.466 Stimmen, 0,7%
1957: 4.109 Stimmen, 0,4% (-0,3)
1961: 9.045 Stimmen, 0,9% (+0,5)
Hessen
1958: 16.178 Stimmen, 0,6%
Neddersassen
1951: 74.017 Stimmen, 2,2%
1955: 126.692 Stimmen, 2,8% (+0,6)
1959: 122.062 Stimmen, 3,6% (+0,8)
1963: 52.785 Stimmen, 1,5% (-2,1)
Noordrhien-Westfalen
1950: 107.104 Stimmen, 1,7%
1958: 43.299 Stimmen, 0,5%
Rhienland-Palz
1951: 7.185 Stimmen, 0,5%
1959: 87.349 Stimmen, 5,1% ( 1 Sitt )
1963: 56.155 Stimmen, 3,2% (-1,9)
Saarland
1960: 3.325 Stimmen, 0,6%
Sleswig-Holsteen
1950: 37.115 Stimmen, 2,8%
1954: 17.318 Stimmen, 1,5% (-1,3)
1958: 12.950 Stimmen, 1,1% (-0,4)

In Baden-Württemberg un West-Berlin weer de DRP nich bi Landdagswahlen antreden.

Literatur/Born[ännern | Bornkood ännern]

  • Kurt P. Tauber: Beyond the eagle and swastika. German nationalism since 1945, 2 Bdn.; Middletown, Conn. 1967
  • Peter Dudek / Hans-Gerd Jaschke: Entstehung und Entwicklung des Rechtsextremismus in der Bundesrepublik, 2 Bdn.; Opladen 1984
  • Kurt Hirsch: Rechts von der Union; 1989; ISBN 3-926901-22-5
  • Oliver Sowinski: Die Deutsche Reichspartei 1950 – 1965. Organisation und Ideologie einer rechtsradikalen Partei; Frankfort an’n Main 1998

Nawiesen[ännern | Bornkood ännern]

  1. Kurt Hirsch: Rechts von der Union; 1989, S. 50.