Coupe Jules Rimet

Vun Wikipedia
Wesseln na: Navigatschoon, Söök
De Coupe Jules Rimet as Nabilln

De Coupe Jules Rimet (fr. för Jules-Rimet-Pokal) is vun 1930 bit 1970 de Pokal wesen, de bi de Football-Weltmeesterschop utspeelt weer. Toeerst weer he eenfack as Weltpokal (Coupe du Monde) betekent, is na’n Tweeten Weltkrieg denn aver na den dormoligen FIFA-Präsident Jules Rimet ümnöömt worrn.

Utsehn[ännern | Bornkood ännern]

De Coupe Jules Rimet weer en Statue ut vergoldt Sterlingsülver vun 35 cm Grött. Se harr en Gewicht vun 3,8 kg un stünn op’n blauen Sockel ut Lapislazuli. An de Sieten vun den Pokal weern Goldplaketten anbröcht, worop de Naam vun de Pokal ingraveert weer as ok de Naams vun de negen Weltmeesters, de em wunnen hebbt.

Utklamüstert hett de Statue Abel Lafleur. Se weer in Form vun en Fro utföhrt, as dat bi vele fröhe Pokalen begäng weer. Disse Frongestalt schüll de greeksche Göddin vun’n Sieg, Nike, dorstellen. Ehr Arms weern na baven streckt un harrn Flögels. Ünner de Statue weer Ruum för de Naams vun de Winners.

Winners[ännern | Bornkood ännern]

To Anfang vun de Football-Weltmeesterschop 1930 is künnig maakt worrn, dat de Verband, de mit sien Utwahlmannschop dreemol de Meesterschop winnen kann, den Pokal behollen dröff. As de brasilaansche Mannschop in’t Johr 1970 to’n drüdden mol den Pokal wunen harrn, is de dormit in jemehrn Besitt wesselt.

De Nafolger vun’n Coupe Jules Rimet is de FIFA WM-Pokal, de siet de WM 1974 utspeelt warrt. Anners as sien Vörgänger, warrt de nich duersom vergeven, man de Winnerverband kriggt för veer JOhren en Kopie vun den Pokal utleht. Dat Original blifft ut Grünnen vun de Sekerheit bi de FIFA.

Woneem de Pokal opbewohrt weer[ännern | Bornkood ännern]

De Weltmeester dröff den Wannerpokal bit to de nächsten Weltmeesterschop opbewohren, so weer dat fastleggt. Wiel den Tweeten Weltkrieg weer de Pokal dorüm in Italien – de Viezpräsident vun de FIFA, Ottorino Barassi, hett em in sien Land in en Schohschachtel ünner sien Bett opbewohrt.

Schandaal geev dat üm den Roof vun’n Coupe Jules Rimet in’t Vörfeld vun de WM 1966. De Pokal weer korte Tiet vörher vun’n brasiliaanschen Footballverband wedder in de Verantwoorten vun de FIFA övergeven worrn, un weer as Deel vun en Utstellen „Sport in Breefmarken“ in de Westminster Central Hall in London utstellt, as he an’n 20.März 1966 verswunnen weer. Dat is passeert, wiel in en annern Deel vun’t Bowark en Gottsdeenst afhollen weer. Nipp un nau een Week later is de Pokal wedder togang kamen: en Hund mit den Naam Pickles hett em opspöört, as he in en Vörgoorn in’n Londoner Süüden Gassi föhrt worrn is.

As de Coupe Jules Rimet na de WM 1970 duersom an den brasiliaanschen Fottballverband gahn is, is de Pokal an’n 19. Dezember 1983[1] in Rio de Janeiro noch mol wedder klaut worrn. De Polizei hett rufunnen, dat de Deven den Pokal insmölt hebbt, so dat dat Original verloren is. De brasiliaansche Footballverband is vundaag in’n Besitt vun en Kopie, de in’t hessische Hanau maakt weer un 1984 in’t Düütsche Goldsmeedhuus vör Oort an en brasiliaansche Delegatschoon övergeven worrn is.

Borns[ännern | Bornkood ännern]

  1. FIFA-Kalendernotiz: Diebstahl des Jules-Rimet-Pokals, afropen an’n 18. Dezember 2008