Communauté de Taizé

Vun Wikipedia
De Karken vun Taizé

De Communauté de Taizé (Meende vun Taizé) is en internatschonalen Orden för Mannslüde in Taizé, um un bi 10 km nöördlich vun Cluny, in dat Département Saône-et-Loire in Frankriek. Dat liggt in de Gemarken vun de Region Burgund. Bekannt is düsse Gemeende sunnerlich dör de ökumeenschen Drepen för junge Lüde, de in Taizé un an annere Stäer utricht’ weert. Alleen na Taizé kaamt jedet Johr um un bi 200.000 Besökers ut allerhand verschedene Länner un ut ganz verschedene Karken. Datt de Meende in dat lüttje Dörp in Burgund so veel besöcht warrt, hett besunners mit den Grünner Frère Roger to kriegen. He weer dor Prior vun, bit he in dat Johr 2005 ümbrocht wurrn is. Bit up den hüdigen Dag is he unbannig bekannt un populäär. Hüdigendags höört um un bi 100 Bröder ut 25 Natschonen to den Orden. De aktuelle Prior is Frère Alois.

Geschichte[ännern | Bornkood ännern]

Frère Roger, Vadder un Prior vun de Communauté

1940, as Roger Schutz na Taizé kamen weer, hett dat Dörp achter de Grenz twuschen den düütschen Deel vun Frankriek un den Deel legen, de unner Upsicht vun de Vichy-Regeerung weer. Düütsche Truppen harrn dormols en groten Deel vun Frankriek besett. Schutz hett toeerst en Huus köfft, wo he Flüchtlinge in versteken dö, de vör de Düütschen utbüxt weern. 1942 sünd de Düütschen denn ok in Vichy-Frankriek inmarscheert un Frère Roger möss sülms vör de Gestapo utkniepen. Man as dat Land wedder free weer, keem he 1944 na Taizé torüch. In de Twuschentied harr he de eersten Bröder um sik sammelt. Tohopen hefft se en Communauté (Meende) grünnt, de toeerst evangeelsch, man later ökumeensch ween is. In de Johre na den Tweeten Weltkrieg sünd de Bröder faken to Besöök in en Lager för Kriegsgefangene ween, wat nich wiet af legen hett. Na en Tied hefft se ok dat Tovertroon vun de Wachtlüde kregen, so, datt de de Gefangenen inladen dröffen to de Gottsdeenste an’n Sönndag. 1949 hefft de Bröder beslaten, se wollen nu endgüllig bi dat eenfache Leven blieven un ok nich freen.

An’n 17. April 1949, dat weer de Paaschsönndag, hefft de eersten seven Bröder ehren Eed afleggt. Dat weern Roger Schutz, Max Thurian, Pierre Souvairan, Daniel de Montmollin, Robert Giscard, Axel Lochen un Albert Lacour. Bit up den hüdigen Dag sünd dor nu um un bi 100 Bröder vun wurrn. En drüdden Deel vun jem leevt mank de Armsten allerwegens in de Welt in Elendsquartiere.

Toeerst sünd sunnerlich Theologen na Taizé henföhrt un wollen sik dat Experiment vun en evangeelschen Orden mol ankieken. Later sünd denn en Reeg vun annere Ordens dorhen kamen un hefft dor Dagfohrten un Drepen afholen. In de 1960er Johre güng dat denn ok los, datt jummers mehr Jugendliche de Meende besöcht hefft. Dor konnen se sik, in Gruppen mit Jugendliche ut allerhand verschedene Länner, mit de Bibel un mit geistliche Fragen ut’neen setten. De Bröder un ok Sustern vun en kathoolschen Orden, de mit de Bröder tosamenarbeiden dö, hefft jem dor denn bi holpen. All sünd se in ganz eenfache Hüser unnerkamen un hefft se ganz eenfach Eten kregen. Veel köst hett de Saak nich, man mitarbeiden mössen se in Huus un Hoff.

Jummers mehr Besökers sünd denn kamen un so is de ole romaansche Dörpskarken faken veel to lüttjet ween. 1961 güng dat denn los un an’n Rand vun dat Dörp is de nee „Versöhnungskarken’’ boot wurrn. Ok düütsche Freewillige vun de „Aktion Sühnezeichen’’ hefft dor an mitarbeit. Vun dor af an sünd denn noch mehr Jugendliche na Taizé kamen un 1966 is dor dat eerste Jugenddrepen mit 1.400 Lüde ut 30 Länner afholen wurrn. För allens, wat he för den Upboo vun Europa un för den Freden dor daan hett, hett Frère Roger 1974 den „Fredenspries vun den Düütschen Bookhannel“ kregen, dorto 1988 den UNESCO-Pries för „Uptehn to’n Freden“ un 1989 den „Internatschonalen Karlspries vun de Stadt Aken“. 2003 is de Communauté denn mit den „Dignitas Humana Award“ uttekent wurrn. An’n 16. August 2005 is de Prior vun de Meende bi en Avendgebeet in Taizé vun eene Fro ut Rumänien swarrt mit en Metz staken un verwunnt wurrn. De Fro weer wohrschienlich psychisch nich gesund. Dat duer nich lang un Frère Roger is noch an’n sülvigen Avend door bleven. Frère Alois, de in Stuttgart boren is un de to düsse Tied up den Weltjugenddag in Köln ween is, reis stantepee torüch na Taizé. Al een Dag na Frère Roger sien Dood hett he de Upgaven vun en Prior övernahmen.

De Bröder vun Taizé verdeent, wat se to’n Leven bruukt, mit ehre Arbeit. Spennen nehmt se nich an un wenn se en Arvdeel todacht kriegt, denn geevt se dat an arme Lüde wieter.

Jugenddrepen in Taizé [Bearbeiten][ännern | Bornkood ännern]

En Taizé-Mahltied

Jede Week kaamt en paar Dusend Lüde na Taizé. In de Ferientied in’n Summer un an Paaschen sünd dat to’n Deel bit to 6.000 junge Lüde, de dor eene Weeke lang sünd. Ok öllere Lüde un Familien köönt in en sunnerlichen Deel vun Taizé mitmaken.

De normole Dag för Pilgerlüde in Taizé sütt so ut:

  • 08:15 Morgengebeet mit Avendmahl/Kommunion
  • achterna gemeensam Anbiet
  • 10:00 All höört in’e grote Grupp wat över de Bibel
  • achterna warrt dor in lüttje Gruppen över snackt
  • 12:20 Middagsgebeet
  • achterna gemeensam Middageten
  • 14:00 verschedene Arbeiden, Chor oder mit’nanner Snacken
  • 17:15 Tee
  • 17:45 Themengruppen/Regionaldrepen
  • 19:00 gemeensam Avendeten
  • 20:30 Abendgebeet mit apen Enn
  • 23:30 Nachtroh.

An un for sik gifft dat nich veel Regelwarks in Taizé. Dat gifft Tieden för gemeensam Eten un Beden, bovenhen is de Upentholt dor up anleggt, datt de Gäste eene Weeke lang in de Meende sünd. Losgahn schall dat an un for sik an’n Sönndag namiddags un de Affahrt is denn den neegsten Sönndagmiddag. Man dat geiht ok an annere Dage. Anmellen scholl een sik tominnst twee Weken, ehr he ankümmt. Dat Drinken vun Alkohol is in dat Lager verbaden, Utnahme is de Töönbank vun dat „Oyak“-Huus.

As Jugendlichen gellt de Lüde in Taizé vun 17-29 Johre, dornah sünd se denn de „Groten“ un hefft ehr egen Camp un egene Mahltieden. Jugendliche weert unnerbröcht in Baracken un grote Telten, wer een egen Telt mitbringen kann oder mit Wahnwagen kümmt, hett in de Hauptsaison in’n Summer up jeden Fall en Vordeel.

Jugendliche ut Düütschland mütt in’n Momang an’n Dag twuschen 5,50 € un 7,50 € (mit eenfach Eten) betahlen. För de Groten is dat dürer. De Bedrag is unnerscheedlich, je nadem, ut wat for’n Land de Deelnehmer kümmt. Dat warrt dor up keken, dat jedereen bloß so veel betahlen mutt, as he dat, vun de Weertschop in sien Heimatland her, kann. So betahlt de Düütschen en beten mehr as de Pilgers, de ut’n vörmoligen Oostblock dorhen kamen sünd un up düsse Wiese könnt de, de nich so veel Geld hefft, dor ok mitmaken.

Leeder[ännern | Bornkood ännern]

Besunners bekannt wurrn is de Communauté de Taizé vunwegen de Leeder, de dor sungen weert un de vun dor ut allerwegens in’e Welt mitnahmen wurrn sünd. Düsse Leeder hefft man bloß eene Strophe, sünd eenfach oder ok eenfoldig sett’ un weert faken in veer Stimmen oder as Kanon sungen. Dor weert se noch un nochmol bi sungen. De meisten vun de ganz bekannten Leeder sünd vun 1975 af an vun Jacques Berthier un en paar vun den franzööschen Jesuiten Joseph Gelineau komponeert wurrn. De meisten vun de ne’en Leeder sünd vun de Bröder ut Taizé utklambüstert. De Texte vun düsse Leeder gaht tomeist torüch up en Stäe ut de Bibel. Se sünd up Latiensch oder in een vun de verschedenen Spraken vun de Welt verfaat. För allerhand Leeder gifft dat ok Stimmen för dat Mitspelen vun Instrumenten. In’n Hannel sünd Gesangböker un CDs to kriegen.

Anners wat[ännern | Bornkood ännern]

De Asteroid 100033 Taizé is 1990 nah Taizé benömmt wurrn.

Weblenken[ännern | Bornkood ännern]