Claudio Pizarro

Vun Wikipedia
Wesseln na: Navigatschoon, Söök
Claudio Pizarro
Claudio Pizarro.jpg
Spelerinformatschonen
Vullstännig Naam Claudio Miguel Pizarro Bosio
Geboortsdag 1978-10-033. Oktober 1978
Geboortsoort LimaPeru
Positschoon Störmer
Vereensinformatschonen
Vereen SV Werder Bremen
Trikottall 24
Verenen in de Jöögd
Deportivo Pesquero
Verenen as Speler1
Johren Vereen Spelen (Doren)
1996–1997
1997–1999
1999–2001
2001–2007
vun 2007 af an
2008–2009
2009-
Deportivo Pesquero
Alianza Lima
Werder Bremen
FC Bayern München
FC Chelsea
Werder Bremen (utlehnt)
42 (11)
44 (25)
56 (29)
174 (71)
25 (2)
12 (10)
Natschonalmannschop2
1999- Natschonalmannschop vun Peru 55 (13)

1 Blots Liga-Spelen.
 Stand: 29. November 2008
2Stand: 31. August 2008


Claudio Miguel Pizarro Bosio (* 3. Oktober 1978 in Lima) is en Footballspeler ut Peru. In'n Momang speelt he för den SV Werder Bremen in de Football-Bundsliga.

Kinnertied un Jöögd[ännern | Bornkood ännern]

Sien Kinnertied hett Pizarro tohopen mit siene Mudder Patricia Bosio, sien Vadder Claudio Pizarro Dávila un sien dree Johr jüngere Süster Patricia un sien 12 Johr jüngern Broder Diego in Santiago de Surco verleevt. Dat is en Stadtdeel vun Lima. Sien Vadder weer Offzier bi de Marine. Sien Broder speelt hüdigendags in de U19-Mannschop vun den FC Bayern München. Pizarro is as en richtigen Stratenfootballer ankeken wurrn, man he interesseer sik ok för anner Sportarten, as Basketball, Golf un Tennis. He is to de U17-Natschonalmannschop vun Peru beropen wurrn. As he 17 Johr oolt weer, hett he dat eerste Mol för Deportivo Pesquero speelt. Later is he twee Johr lang för Alianza Lima uplopen.

Sien Weg as Speler[ännern | Bornkood ännern]

In’n Vereen[ännern | Bornkood ännern]

Mit sien Weg in Düütschland güng dat 1999 los. Dormols hett de SV Werder Bremen em för 1,5 Mio. € freeköfft un unner Verdrag nahmen. In siene eerste Saison in de Bundsliga hett he in 25 Spelen 10 Doren schaten. In dat Johr later is he Stammspeler wurrn un hett in 31 Spelen 19 Doren maakt. Dormols weer he mit Ailton tohopen en vun de besten Störm in de Bundsliga un kreeg, mit „Toni“ Ailton tosamen den Ökelnaam „Tonis-Pizza-Express“. Darna hett de FC Bayern München em holt.

In’n Summer 2001 is Pizarro för 8,2 Mio. € na München gahn. Bi den FC Bayern is he dree Mol düütschen Meister wurrn (2003, 2005 un 2006) un hett ok dree Mol den „Pott“ (den DFB-Pokal, 2003, 2005, 2006) holt. Dor keem noch eenmol de Weltpokal to (2001) un een Mol de DFB-Ligapokal (2004). De Verdrag, de an’n 30. Juni 2007 utlopen dö, is denn nich verlängert wurrn.

Bi’n FC Bayern hett Pizarro de Trikotnummer 14 harrt.

To de Saison 2007/2008 hett Pizarro ohn Aflösung to’n engelschen Premier-League-Vereen wesselt. Dor hett he en Verdrag över veer Johren unnerschreven. An’n 24. Juli 2007 is he offiziell vörstellt wurrn. He kreeg ok in Chelsea de Trikotnummer 14. De harr vördem Geremi harrt, man de weer weggahn. Glieks in dat eerste Speel in de Premier League an’n 12. August 2007 hett he gegen Birmingham City dat eerste Mol drapen. Man achterher dö dat nich so goot lopen för em. He seet meist up de Bank un för de Trüggrunn in de Champions-Legue is he gor nich mehr anmellt wurrn. So keem dat, dat he untofreden weer un to de Saison 2008/2009 utlehnt weern konn an den SV Werder Bremen. Bremen möss för düt Geschäft 1,5 Mio. € Aflöös an Chelsea betahlen un den gröttsten Deel vun Pizarro sien Verdeenst övernehmen (2,3 Mio. €, den Rest vun 1,5 Mio. € betahl Chelsea).[1] He hett in düsse Speeltied 17 mol för den SV Werder drapen un weer Werder sien besten Doorschütten. In de Bundsliga güng de Saison mit den 10. Platz toenne, man he hett mit Werder den DfB-Pokal wunnen. Dornah is he wedder na Chelsea gahn un hett sik mit den Vereen in London up de nee Saison instellt. An'n 10. August 2009 hett he en Verdrag över dree Johre mit de Optschoon över noch en Johr in Bremen unnertekent.

Natschonalmannschop[ännern | Bornkood ännern]

Pizarro is Kaptein vun de Natschonalmannschop vun Peru. Düt Team hett dat nich schafft, sik för de WM in Düütschland 2006 dör to setten un dröff dor nich henfohren. In 11 Spelen bi de Qualifikatschoon, wo he mitmaakt hett, hett he bloß man een Door schaten.

Tovören hett Pizarro mit Peru al bi de Copa America 2004 mitmaakt. Dor is he in dat Viddelfinaal gegen Argentinien utscheden. In en Speel is sien Schädelpann anreten un he konn en Reeg vun Maanden nich mehr mitspelen.

An’n 18. Oktober 2006 hett Pizarro vunwegen en Striet mit den Trainer vun de Natschonalmannschop, Franco Navarro en Breef an den Footballverband vun Peru schreven un seggt, he wull nich mehr för Peru spelen, so lang as Navarro noch Trainer vun de Mannschop is. An’n 9. Dezember geev dat wedder Theater. De Footballverband hett bekannt maakt, Pizarro un dree annere Speler weern nu ut de Mannschop utslaten, vunwegen dat se na en Speel gegen Brasilien allerhand Saken maakt hebben schollen, de vun’n Verband verbaden weern. Besunners hefft se sik woll een antüdert. Denn keem ok noch rut, he scholl sik mit Punken in en Swimmingpool un in en Parkhuus vergnöögt hebben un dor scholl dat Films vun geven.[2]

In’n Juli 2008 sünd avers al Spelers, de dor bi weern, in Gnaden wedder upnahmen wurrn.

Privatleven[ännern | Bornkood ännern]

1999 hett Pizarro sien Fründin ut School- un Jugenddage, Karla Salcedo, heiraat. An’n 17. Oktober vun dat sülbige Johr is sien eersten Söhn, boren wurrn. Midderwielen hefft de beiden noch en Söhn un ok noch en Dochter.

Weblinks[ännern | Bornkood ännern]

Belegen[ännern | Bornkood ännern]

  1. http://www.kicker.de/news/fussball/bundesliga/startseite/artikel/381931/
  2. Rheinische Post: Sex-Skandal in Peru