Cecil Madigan

Vun Wikipedia
Wesseln na: Navigatschoon, Söök
Porträt vun Cecil Madigan mit Verfreesen up Adelie Land in den Verloop vun de Australasiaatsche Antarktisexpeditschoon (Bild 1913)

Cecil Thomas Madigan (* 15. Oktober 1889 in Renmark, South Australia, Australien; † 14. Januar 1947 in Adelaide, South Australia), weer en austraalsch Opdecker, Polarforscher, Geograph un Geoloog.

Madigan hett up sien Expeditschonen de nee’esten Kommunikatschons- un Transportmethoden bruukt un wurr dör sien wetenschaplich Arbeiten insbesünnere över de MacDonnell Ranges, de Simpsonwööst un den Lake Eyre to en Authorität vun de austraalsch Geologie un Geografie.

Fröhe Johren[ännern | Bornkood ännern]

Cecil Madigan weer de Söhn vun Thomas Madigan un Mary Dixie, borene Finey. Cecil Madigan harr en jüngeren Bröer un twee Süsters. Nahdem sien Vader up de Goldfelder bi Kalgoorlie in Western Australia to Dood kommen weer, muss sien Moder as Schoolmeestersche arbeiten, üm de Kinner dör de Tiet to bringen. Madigan gung in Adelaide up de School, bevör he en Studium as Bargbauingenieur an de Universität Adelaide upnehm. He kreeg en Stipendium an de South Australian School of Mines and Industrie.

An’ 20. August 1915 hett he Wynnis Knight Wollaston in Adelaide heiraadt, mit de he dree gemeensam Söhns un twee Döchter harr.[1]

Antartisexpeditschoon[ännern | Bornkood ännern]

Af 1911 studeer Madigan in England un wurr vun den Polarforscher Sir Douglas Mawson to’n Meteorologen vun de Australasiaatsche Antarktisexpeditschoon utwählt. Mit Mawson bleev he tietlevens grüenschaplich verbunnen. Madigan weer in disse Tiet in de Antarktis ok an verscheeden Expeditschonen över dat Inlandies bedeeligt. Een dorvan führ hüm nah Adelieland, een wiedere in’ Sömmer 1912-13 bit in dat ruchweg 800 Kilometer entfernt George V Land. He hett ok de Söökexpeditschoon nah den in Schwierigkeiten geraden Douglas Mawson anführt. För sien Leistungen wiels disse Expeditschonen wurr he 1914 mit de King’s Polar Medal uttekent.[1]

Kriegsdeelnahm[ännern | Bornkood ännern]

Nahdem he 1914 nah Oxford trüggkehrt weer, is he in de Royal Engineers Company intreden, wo he 1916 to’n Captain befördert wurr. He hett in Frankriek kämpt un wurr versehrt. Nahdem he weer gesund weer kehr he in’ Mai 1916 wedder in dat Kriegsgeschehen nah Frankriek torüch.[1]

Geologisch Erkunnen[ännern | Bornkood ännern]

Na dat Enn’ vun den Krieg hett he an dat Magdalen College in Oxford sien Geologiestudium spoodriek afslooten. 1920 kreeg he an de Universität Adelaide en Anstellung as Geoloog. Dissen Deenstposten harr he bit to sien Dood.

He hett ünner annern dat Binnere vun de Fleurieu Peninsula utforscht. 1929 hett der Vörsitter vun de Royal Geographical Society of Australasia Allan Simpson sien Plaan ünnerstutt, Deelen vun Zentraalaustralien un dat Northern Territory middels Luftupnahmen to erkunnen. Dat weer dat eerste Mal, dat systematisch fotografisch Upnahmen över Australien un geologisch Erkunnen vun Floogtüüch ut dörführt wurrn. Dorbi wurr de Simpsonwööst opdeckt. Se wurr vun Madigan nah sien Förderer Allan Simpson nömmt.

Dör Överfleegen wurr de riesige Lake Eyre, en Soltsee in Zentraalaustralien, genauer erfaat. Dorbi gung dat vör allen dorüm, de Grött vun dat Waterintoogrebeet to bestimmen. To de genauere Erforschung vun den See wurr ok en Erkundung mit Fohrtüüch över den Soltsee vörnommen.

Midden vun de 1930er Johren hett Madigan de MacDonnell Ranges, James un Waterhouse Range utforscht. 1932 hett he in’ Updrag vun en Blatt ut Sydney över de Goldfelder vun Granites in Zentraalaustralien bericht. Um 1933 beschreev he Meteoriten un Meteoritenkrater un is an de Inslagsöörd vun de Henbury-un Huckitta-Meteoriten un to’n Boxhole-Krater reist.

In’ Winter 1939 hett Madigan mit en Expeditschonsmannscha de Simpsonwööst dörquert vun de Andado Station in’ Northern Territory bit nah Birdsville in Queensland. In’ Verloop vun de Expeditschoon, de mit Kamelen dörführt wurr un 25 Daag düer dee, kunn eerstmals en mobil Funkstatschoon mitführt un de austraalsch Apenlichkeit loopend över de Ergevnisse vun de Expeditschoon ünnerricht wurrn.

1940 nehm he den Deenst as Chief Instructor an de School of Military Field Engineering in Liverpool in New South Wales up un wurr bit to’n Oberstleutnant befördert. He hett sück ok mit Wasserressoursen befaat. 1943 hett he de Armee weer verlaaten un gung an de Universität Adelaide torüch.[1]

Persönlichkeit[ännern | Bornkood ännern]

Madigan weer gegenöver neetietlich Methoden in de geologisch Forschung un in’ Transportwesen bannig upslooten. He weer Liddmaat in tallriek wetenschaplich un anner Organisatschonen. So heer he to’n Bispeel Liddmaat vun de Geological Society of London, Präsident vun de Royal Society of South Australia un Dräger vun de Verco-Medaille. He arbeit ok in de Boy Scouts’ Association af 1934, in’ Legacy Club un in’ National Co-ordinating Council for Physical Fitness mit.

1962 wurr to Erinnerung an sien Dörqueren vun de Simpsonwööst en Gedenksteen in Birdsville upricht.[1]

Böker[ännern | Bornkood ännern]

  • Central Australia. Oxford University Press. Melbourne.
  • Crossing the Dead Heart. Georgian House. Melbourne. ISBN 1-876622-16-4

Enkeld Nahwiesen[ännern | Bornkood ännern]

  1. 1,0 1,1 1,2 1,3 1,4 adb.anu.edu.au: L. W. Parkin: Madigan, Cecil Thomas (1889–1947), in engelsch Spraak, afropen an’ 9. Dezember 2012