Cecil De Vere

Vun Wikipedia

Cecil De Vere (* 14. Februar 1845 in Montrose as Cecil Valentine Brown; † 9. Februar 1875 in Torquay) weer en britisch Schachmeester.

He wurr 1845 as unehelich Kind vermootlich in Montrose in de Grafschap Angus in Schottland boren, mögelkerwies aber ok in Stirling. En Gebortsoorkunn wurr nie nich funnen, sien Vader is unbekannt. Dor he sien Naam as he vulljohrig weer in Cecil De Vere ännert hett, is spekuleert wurrn, dat dat de Familiennaam vun sien Vader weer. In jung Johren keem he nah London un hett mit twalf Johr ünner Anleiden vun Francis Burden dat Schachspelen lehrt. In de Folg hett he regelmatig dat Schachcafe Simpson's Divan in London besöcht. Hier hett he sück mit den Schachmeester un Schachschriever George Alcock MacDonnell (1830-1899) anfrüend, mit de sien Hülp he sien Speelstärke stiegern kunn.

För Upsehn sörg he as he in' Dezember 1865 en Tweekamp gegen Wilhelm Steinitz (7:3 bi zwei Remispartien) winnen kunn. Allerdings harr Steinitz den Nahwussmeester ünnerschätzt un in jeder Partie een Buer un een Toog vörgeven. Steinitz hett dat Talent vun de de Vere mit dat vun den jungen Paul Morphy vergleeken. En Wettkamp ahn Vörgaav in' Juni 1866 hett Steinitz denn aber mit 2:0 bi twee Remispartien wunnen.

In dat glieker Johr wurr in London de eerste engelsch Meesterschap utdragen. De Vere wunn de in övertüügen Manier (twalf Siege, kien Partie verloren) vör Macdonnell un wurr so de eerste offizielle britisch Meester. 1867 hett he in Paris sien eerst internatschonal Turnier bestreeden un keem dorbi up Platz 5.

Sien Levensünnerholt verdeen he as Angestellter bi Lloyd's. Enn’ 1867 hett man hüm seggt, dat he nich heelbor an Lungentuberkulose erkrankt weer. En Johr vörher weer ok noch sien Moder storven. Dat weer all tovöl för hüm. He kreeg Depressionen un fung an to suupen. He hett bi Lloyd's künnigt un leev vun dor an vun dat Arv vun sien Moder un Gewinnprämien ut dat Schachspeel.

Tweemal belegg he bi de britisch Meesterschap noch den deelten eersten Rang: 1868/1869 mit Joseph Henry Blackburne, 1872 mit John Wisker, allerdings verlor he beid Steekkämpe.

1870 gelungen hüm bi dat Turnier in Baden-Baden noch eenige spektakuläre Siege (so gegen Johannes Minckwitz), he belegg in dat stark düppelrundig Turnier den 6.-7. Platz.

För de Londoner Zeitung The Field hett he en Schachdeelen betrüet, muss dat aber 1872 wegen sien Gesundheit upgeven. Sien Nahfolger up dissen Posten wurr Steinitz. In’ Februar 1874 hett in den City of London Chess Club noch en Wettkamp mit Johannes Hermann Zukertort speelt, wat he mit 1:2 verlor.

Bi en Kurupenholt in Torquay is he 1875 storven un kreeg dor en Armenbegrävnis.

Wiel De Vere wegen sien tragisch Levensverloop nich bit to de absolute Weltspitz vördringen kunn, is he in de Nahwelt so good as vergeeten wurrn.

Literatur[ännern | Bornkood ännern]

  • Owen Hindle und Bob Jones: The English Morphy? The life and games of Cecil De Vere, first British chess champion. Keverel Chess Books, Exmouth 2001. ISBN 0-9531321-4-5