Bundsstraat 73

Vun Wikipedia
Wesseln na: Navigatschoon, Söök
Bundesstraße 73
Basisdaten
Längd alltohoop: ca. 100 km
Bundslänner: Neddersassen
Hamborg
Grundricht: West-Oost
Koort
Verloop von de Bundsstraat 73
Verloop von de Bundsstraat 73
De B 73 in Oterndörp
De B 73 (Buxthuer Straat) in Horborg

De Bundsstraat 73 is ene Bundsstraat in Düütschland, de vun Cuxhoben bet na Hamborg geiht un üm un bi 100 Kilometer lang is.

Inricht worrn is de Straat 1932 as Rieksstraat 73. 1955 bet 1957 keem de Ümgehungsstraat för Stood un 1962 ok för Buxthuud. Op de Bundsstraat 73 is jümmer temlich veel Verkehr, so 30.000 bet 40.000 Wagen jeden Dag, un de Straat is ok jümmer en beten gefährlich. So geev dat vun 1995 bet 2000 71 Unfäll mit 82 Swoorverletzte un twölf Dode. Dorüm warrt nu de Autobahn 26 twischen Hamborg un Stood boot, de den Verkehr vun de B 73 opnehmen schall.

De Straat fangt bi Olenwoold in’n Landkreis Cuxhoben an de Autobahn 27 an un löppt denn in en Bagen dör Cuxhoben, raakt in Groden wedder an de A 27 un löppt denn na Oosten an Oterndörp langs un na Neehuus. Dor dreiht de Straat denn na Süüdoosten, löppt dör Kumbarg na Hemmoor/Warstood/Basbeek, drippt dor op de Bundsstraat 495 un geiht denn bi Heckthusen över de Oostbrügg Heckthusen över de Oost. Dor fangt de Landkreis Stood an. De Bundsstraat geiht denn dör Himmelpoorten un an Stood langs. Bi Ottenbeek münnt de Bundsstraat vondaag in de A 26. De ole Verloop von de Straat geiht över en Affohrt över de Öörd Gothenborg un Hornborg na Buxthu. Bi Öbergünn geiht na Süden de B 3 von de B 73 af un kort vör Vosshuusen na Noorden de B 3n. De B 73 löppt denn dör Neegraven un Huusbrook un is dor an de A 7 anslaten. De B 73 ennt denn in Horborg bi de B 75/A 253.