Bundsautobahn 27

Vun Wikipedia
Wesseln na: Navigatschoon, Söök
Bundsdüütsche Autobahntall 27
Verloop vun de A 27

De Bundsautobahn 27 (Afk.: BAB 27 oder A27) is en överregionale Autobahn in Neddersassen un Bremen. Se verlöpt över en Samtläng vun 162 km vun’t Autobahndreeeck Walsrood bit hen na Cuxhoben. Dat Autobahndreeeck Walsrood twiegt dorbi vun de BAB 7 af. Vun dor föhrt de A 27 in Richt Noordwesten na Bremen, woneem se de BAB 1 krüüzt un denn wieter ööstlich vörbi an Bremerhoben bit na Cuxhoben. De A 27 warrt in’t Europastratennett op ehr hele Läng ok as Europastraat 234 (E 234) list.

Dör de Verbinnen na de Havens vun Bremen, Bremerhoben un Cuxhoben warrt över disse Streck veel Sworlastverkehr afwickelt. Afsehn vun dat Bremer Rebeet verlöpt de A 27 tomeist över bultige Geestlandschop.

Historie vun de A 27[ännern | Bornkood ännern]

De A 27 bi Bremerhoben

De Autobahnafsnitt in’t Rebeet vun’t Bremer Blockland tellt to de öllsten düütschen Autobahnen. Se is anfangs as Wieterföhren vun de A 1 boet worrn, de vun Hamborg keem un na de Richt na Ihlpohl in’n Noorden vun’n Bremen wieterföhren schüll. De Bo hett 1933 anfungen. 1937 is de Blocklandautobahn apen maakt worrn.

Enn vun de 1950er Johren is de Afsnitt twüschen Bremen un Walsrood angahn worrn, üm de A 27 mit de A 7 to verknütten. Anfang vun de 1960er Johren is de Autobahn vun Bremen anfungen na Süüdoosten hen apen maakt worrn. Dat letzte Deelstück twüschen Veern un Walsrood weer 1964 in Bedriev nahmen.

De Utbo in de annere Richt över Brevenhoben bit na Cuxhoben hett noch mehrere Johren op sik töven laten. De eerste Afsnitt dorför is Enn vun de 1960er Johren maakt worrn in Form vun en Autobahnümgahn üm Bremerhoben, de 1974 apen maakt weer. As Anfang vun de 1980er Johren de beiden fehlen Deelstücken twüschen den Verdeler Bremen-Noord un Bremerhoben-Süüd as ok twüschen Debst un Cuxhoben fardigstellt weern, övernehm de Autobahn de Funkschoon vun de vullkamen överlast B 6. Disse Streckenafsnitt warrt ok as Schellfischlien betekent.

In’n November 2005 is de Utbo op söss Sporen twüschen Bremen-Överseestadt un Bremen-Borglesum as de so nöömte „Blocklandautobahn“ afslaten worrn, üm dat de Stau, de Dag för Dag vun wegen de Pennlers vun un na Bremen tostannen kummt, oplöst warrt. Ansonsten is de Autobahn aver veersporig. Bi de Utbo geev dat’n Striet twüschen Bremen un Oosterholt, wiel bi de ne’en Schiller an de Affohrt Hu’e-Süüd toeerst de Henwies op de Kreisstadt verswunnen weer.

Sünnerheiten[ännern | Bornkood ännern]

De Affohrt Segelsbrugg is en Sünnerheit, vun wegen dat se – anners as de Naam denken lett – nich in Hemeln-Segelsbrugg liggt, man fief Kilometer wieter op dat Rebeet vun de Gemeen Eiten in’n Landkreis Veern, dat hier jüst direkt an Bremen-Oosterholt angrenzt. Dordör schall hinnert warrn, dat de Oortsdeel mit dat ’n beten wieter in’n Noorden liggen Oosterholt-Scharmbeck verwesselt warrt.

Ok dat Bremer Krüüz liggt nich in de Stadtgrenz vun Bremen, man höört ok to’n Landkreis Veern. An de Autobahn sünd Henwiesschiller op dat Bundsland Neddersassen un de Hansestadt Bremen opstellt worrn. Se geevt aver nich den wohren geograafschen Grenzverloop wedder.

Dicht bi de Anslussteed Bremen-Hoorn/Lehe kann een vun de Autobahn ut de opfallige Falltoorn vun de Universität Bremen sehn.

Bi den Bremer Oortsdeel Borg-Grambke gifft dat op de Fohrbahnsiet na Süüden to noch Resten vun en Opfohrt ut de Anfangsjohren vun de Autobahn. Dör den Ümbo sünd disse Resten aver vundaag kuum mehr to finnen. In de 1970er Johren geev dat Diskusschonen doröver, disse Opfohrt, de to de Tiet noch nich tonichten weer, wedder in Bedriev to nehmen. Man, de Ansichten sünd gau nalaten worrn.

nöördlich Enn vun de A 27 in Cuxhoben

In’t Rebeet vun Bremerhoben sünd Delen vun de Streck as Poolgrünnen mit Bohrpolen mit 30 m Läng utföhrt worrn, üm de mehr as 15 m dicken Moorschichten to dörslahn. Dorto höört de Rebeden vun de Affohrt Bremerhoben-Süüd/Ness mit de To- un Affohrten un en vun en Deelstück twüschen de Affohrten Bremerhoben-Mitt un Bremerhoben-Överseehavens.

Dat Deelstück twüschen de Anslussteed Debst un dat Autobahnenn bi Cuxhoben is mit drangere Fohrbahnen un mit’n drangeren Sietenstriepen boet worrn, üm de Kosten sieter to maken. Dat passt aver to den düütlich dünneren Verkehr in dat Rebeet.

De Tofohrtrampen to de Helpslannbahnen in de Rebeden in’n Noorden vun de Affohrt Niewohl un in’n Süüden vun de Affohrt Hagen/Hogenheid sünd in de Twüschentiet opgeven worrn.

Plaans[ännern | Bornkood ännern]

Opstunns warrt vun’t Land Neddersassen en Verlängern vun de A 27 vun Walsrood in Richt op Berlin to nadacht. Mit en akkeraten Plaan dorför is aver nich vör 2015 to reken[1] .

De Tank- un Rastanlaag Langwedel/Daben (in Tokumst „Goldbeek“) schall beidsietig utboet warrn, üm dat dor mehr Autos jemehrn Parkplatz finnen künnt. De Helpsutfohrt, de opstunns över de hüütige Anlaag besteiht, schall dicht maakt warrn. An ehr Steed schall denn nipp un nau in de Neeg vun de tokamen Tank- un Rastanlaag de ne’e Anslusssteed Langwedel boet warrn. Dat dorför nödige Plaanfaststellensverfohren is an’n 15. Mai 2008 inleidt worrn[2].

Borns[ännern | Bornkood ännern]

  1. Pressemitdelen vun’t Nds. Weertschopsministerium vun’n 10. April 2008
  2. [1]

Weblenken[ännern | Bornkood ännern]

Commons-logo.svg Bundsautobahn 27. Mehr Biller, Videos oder Audiodateien to’t Thema gifft dat bi Wikimedia Commons.