Bundsautobahn 13

Vun Wikipedia
Wesseln na: Navigatschoon, Söök
Stratenschild vun de A 13
Verloop vun de A 13

De Bundsautobahn 13 (Afk.:BAB 13, in Kortform ok A 13 nöömt) is en Autobahn in’n Oosten vun de Bundsrepubliek Düütschland.

Verloop[ännern | Bornkood ännern]

De A 13 dörlöpt op en Samtläng vun ruchweg 152 km de Bundslänner Brannenborg un Sassen un verbinnt de Städer Berlin un Dresden mit’nanner. Ehrn Anfang hett se an’n süüdlichen Berliner Ring (A 10) an’t Schönefelder Krüüz un verlöpt vun dör in Richt Süüden över Bestensee, Teupitz, Schwarzheide un Radeburg bi na’t Autobahndreeeck Dresden-Noord mit de A 4.

Ruchweg in de Mitt vun de Streck twiegt de A 15 af, so dat ok de Stadt Cottbus an disse Verbinnen ansluten deit.

Historie[ännern | Bornkood ännern]

De Streck vun de A 13 is in de fröhen 1930er Johren plaant worrn, man noch mit en anneren Verloop as dat naher ümsett worrn is. De Streck schüll oorsprünglich üm un bi 30 km wieter in’n Westen twüschen Golßen un Ortrand verlopen, ruchweg an de Bahnstreck Berlin-Dresden langs. Dormit harr se an de Öörd Doberlug-Kirchhain, Finsterwalde, Luckau un Schlieben vörbi föhrt. Dat Autobahndreeeck mit de A 15 harr dat na den Plaan nich geven.

De Afsneden twüschen dat Krüüz Schönefeld un de Anslusssteed Teupitz, as ok vun’t Dreeeck Dresden-Noord bit to’n Ansluss Ortrand weern 1938 mit twee Fohrstriepens in jede Richt boet worrn, De Afsnitt twüschen Ortrand un Ruhland is mit een Fohrstriepen fardigstellt worrn. De tweete Fohrbahn weer hier eerst 1939 för den Verkehr freegeven. Dat glieke Johr weer ok de 39,5 km lange Afsnitt vun Ruhland na Calau tweestriepig fardigstellt. 1940 kemen denn de Deelstücken twüschen Teupitz un Freiwalde, un twüschen dat Autobahndreeeck Spreewald bit na de Anslusssteed Calau. De Lück twüschen Freiwalde und dat AD Spreewald is ok noch dat glieke Johr fardig worrn, aver toeerst in eenstriepige Utföhren. Eenzig de Krüüzung in’n Autobahndreeeck Spreewald is nich toenn boet worrn. Dorüm müssen de Fohrtüüch vun un na Dresden de süüdlichen Rampen in’n Gegenverkehr dörfohren. Eerst an’n 4. Dezember 1962 is dat Autobahndreeeck krüüzungsfree för den Verkehr freegeven worrn.

De A 13 an’t Dreeeck Spreewald

Twüschen 1951 un 1971 is de A 13 tietwies in’t Rebeet vun’t Autobahndreeeck Dresden-Noord as Motorrad- un Autorennstreck bruukt worrn (Autobahnspinn Dresden).

In de eersten Plaans na de Wenn weer dat düütsche Deelstück vun de Autobahn vun Dresden na Prag as Wieterföhren vun de A 13 andacht. Inwtüschen is de Verbinnen na Tschechien aver as A 17 ümsett worrn.

Op en Strechenafsnitt, de twüschen de Anstlusssteden Ortrand un Ruhland lang liekut föhrt, geev dat bit in de 1990er Johren en Autobhan-Hülpflaagplatz. Hier weer de Gröönstriepen in de Mitt betoneert, so dat de beiden Fohrbahnen tosamen en Start- un Lannbahn geven de. Disse Steed weer för de Flegers vun de NVA un verbünnte Strietkräft dacht, vunwegen dat na en Szenario de Flaaghavens blots för Strats vörsehn weern. Man harr dormit rekent, dat in’n Fall vun en Invasion de Heimatflaaghavens nich mehr anstüert warrn künnen.

Dat geev an beide Ennen vun de Startbahn Stellplätz för Düsenflegers, de an de optempelten Afgasstrahlafwiesers to kennen weern. So schüll hinnert warrn, dat dör de Düsendriefwarken de Woold Füer fangt. Na de Wenn sünd de Stellplätz torüchboet un in Parkplätz ümwannelt worrn.

Weblenken[ännern | Bornkood ännern]

Commons-logo.svg Bundsautobahn 13. Mehr Biller, Videos oder Audiodateien to’t Thema gifft dat bi Wikimedia Commons.