Bundsautobahn 11

Vun Wikipedia
Wesseln na: Navigatschoon, Söök
Stratenschild vun de A 11
Verloop vun de A 11

De Bundsautobahn 11 (Afk.:BAB 11, in Kortform ok A 11 nöömt) is en Autobahn in’n Oosten vun Düütschland. Se föhrt vun de poolschen Grenz op 109,9 km bit in de Neeg vun Berlin. De A 11 is Deel vun de Europastraat 28 un vun de so nöömten Berlinka.

Verloop[ännern | Bornkood ännern]

De A 11 bi Kilometer 33, Anslusssteed Finowfurt

De Autobahn hett ehrn Anfang an den Grenzövergang Pomellen na Polen in’n Ansluss an de poolsche Autostrada A 6. Vun dor verlöpt se toeerst 19 km in Richt Westsüüdwest dör Mekelnborg-Vörpommern. In Hööch vun de Anslussteed Schmölln geiht se denn in dat Rebeet vun Brannenborg. Vun dor an knickt de Streck in süüdsüüdwestliche Richt af un verlöpt 91 km dör dat Bundsland Brannenborg. An’t Autobahndreeeck Krüüz Uckermark münnt de A 20 ut Richt Rostock un Stralsund mit den Ansluss vun’t Eiland Rügen in. De Bundsautobahn 11 höört an’n Berliner Ring, also an de A 10 kort vör de Stadtgrenz, op.

De Anslusssteden vun de AUtobahn warrt vun de poolschen Grenz ut in Richt Berlin hoochtellt. De Kilometers fangt aver an’t Autobahndreeeck Schwanebeck an to tellen. De Grenzövergang na Polen liggt bi Kilometer 109,9.

Historie[ännern | Bornkood ännern]

Die Autobahnbrüch bi Finowfurt in’n August 1952. Disse Brüch weer vun Agenten in Brand sett worrn.
A 11 bi Kilometer 99 in’t Johr 2006: Gresig Tostand vun de Süüdfohrbahn

De Boplaan för den Stettiner Aftwieg (vundaag dat Dreeeck Schwanebeck) un de eersten veer Stratenkilometers mitsams de Överföhren vun de Rieksstraat 2 füng in’n April 1935 an. De Bo weer to’n een en Projekt üm Arbeitssteden to maken, to’n annern schüll dormit in de struturarmen Gegend de weertschoppliche Opswung vöranbröcht warrn.

De Streck vun’n Berliner ring bit na Juchtebüdel is al an’n 4. April 1936 freegeven worrn, un bit to’n 27. September vun’t sülve Johr künn een al op de Autobahn bit na Stettin-Süüd fohren. 1937 sünd de Oderbrüchen fardigstellt worrn un de Streck üm Stettin rüm weer freegeven. Siet de 1930er Johren is en Verlängern bit Berlin-Tempelhof (ehmolige A 102) plaant wesen. Bit 1989 weer de Wieterföhren vun de A 11 dör dat Oostberliner Büro för Deepboplanen un Koordineeren in de Boplanen vun Oost-Berlin inbetogen. As Berlin aver denn weddervereent weer, is de Plaan opgeven worrn.

Bit to de Weddervereenigen 1990 harr de Westberliner Deel vun de Transitautobahn na Hamborg de Beteken A 11. Nu warrt se as A 111 betekent. De Aftwieg vun de A 11 vun’n Berliner Ring, de vundaag Dreeeck Schwanebeck nöömt warrt, harr fröher ünner annern den Naam „Bernauer Slööp“ un is för Autorennen bruukt worrn. De Pielkurv is in de 1990er Johren afreten worrn.

Siet 1996 warrt de Autobahn op’n gröttsten Deel vun ehrn Verloop dör’n modernen Stratenbelag un de streckenwiese Neeanlaag vun Standstriepens vun Grund op nee maakt. AS Sünnerheit hett de A 11 in’t Rebeet vun’t Biosphärenreservat Schorfheide-Chorin keen Standstriepen, ofschoonst de Neeutbo na 2000 maakt worrn is. Noch bit 2007 weer de Autobahn an eenige Steden in en gresigen Tostand. To’n Bispeel weer de Verkehr twüschen Kilometer 95,0 un Kilometer 101,0 siet 2003 blots op een Forhbahn mit blots een Spoor in jede Richt föhrt. De annere Fohrbahn bestünn noch ut sprocke Betonplatten ut de 1930er Johren (kiek ok dat Bild). Eerst in’n Dezember 2007 is de saneerte Streck freegeven worrn[1]. Siet 2008 warrt de Streckenafsnitt twüschen dat Autobahndreeeck Krüüz Uckermark un de Anslusssteed Schmölln nee maakt.

Sünnerheiten[ännern | Bornkood ännern]

Twüschen de Anslusssteden Juchtebüdel un Pfingstberg gifft dat en Wildbrüch. De Brüch is ut Stahlbeton, wo en sünnere Folie röverleggt worrn is, de achterran mit Sand un Bodden afdeckt worrn is. De in’n Mai 2005 fardig stellte Bo hett ruchweg 3 Millionen Euro köst. Siet de Fardigstellen warrt de Weg mit Kameras överwacht. Bit to’n Oktober 2006 sünd 2.300 Wildwessels tellt worrn. Nütt warrt de Brüch vun Damwild, Reh, Wildswien, Hasen, Vöss, Dassen, Marderhunnen un Marders. Rootwild weer bit to de Tiet noch nich beobacht worrn[2].

Borns[ännern | Bornkood ännern]

  1. Arbeiten an A 11 afslaten-MVregio
  2. Märkische Oderzeitung, 18. Okt. 2006, S. 11

Weblenken[ännern | Bornkood ännern]

Commons-logo.svg Bundsautobahn 11. Mehr Biller, Videos oder Audiodateien to’t Thema gifft dat bi Wikimedia Commons.