Bundsautobahn 103

Vun Wikipedia
Wesseln na: Navigatschoon, Söök
Stratenschild vun de A 103
De A 103 in de Neeg vun de Utfohrt Saarstraße

De Bundsautobahn 103 (Afk.:BAB 103, in Kortform ok A 103 nöömt) is en Autobahn in’n Berlin. Se hett en Samtläng vun 5 km un verbinnt den Berliner Stadtring (A 100) vun’t Autobahnkrüüz Schöneberg mit den Steglitzer Kreisel. Dat is also en reine Stadtautobahn.

De Streck nimmt op ehr helen Länge de Bundsstraat 1 op, de bit Anfang vun de 1970er Johren op’n parallelen Stratentog mit de Hauptstraße, Rheinstraße un Schloßstraße verlööp. Üm de Oortsdelen Friedenau un Steglitz vun’n Swoorverkehr to entlasten is se op de A 103 swenkt worrn.

De BAB 103 weer en Deel vun de plaanten Westtangent. Na den Flachennüttplaan (FNP) 1965 för West-Berlin schüllen de Noord-, Süüd-, Oost- un Westtangent, de noch to boen weern, de histoorsche Mitt vun Berlin, de as geograafsche Kreisfigur ansehn warrn kann, tangeeren. Dorbi weer de A 103 na Noorden hen över den Autobahnstump vun de Anslusssteed Sachsendamm wieterboet worrn. De plaante Streck harr de Autobahn dör den Tiergartentunnel oder de Entlastungsstraße na’t Autobahnkrüüz an’n Lehrter Stadtbahnhoff föhrt, woneem denn en Verbinnen mit de BAB 107 herstellt warrn schüll. ’N beten wieter na Noorden an’t Krüüz Amrumer Straße weer de A 103 in de A 105 övergahn. Dor weer denn ok en Verknütten to de A 100 tostannen kamen. De U-Bahnhoff Amrumer Straße is bolich dorop instellt: In wiete Deelen vun’n Bahnhoff is de Deek sieter, vun wegen dat baven dorvun en Autobahntunnel vörbereit weer. An’t Tempelhofen Ufer weer en Krüüz mit de ehmols plaanten A 106 plaant.

De Plaan för de Westtangent weer vun Anfang an dat Teel vun Börgerprotesten. Na Johrteihnten hett de Berliner Senat dat Ansinnen denn opgeven un deAutobahndeelstücken, de in de Stadt al boet weern, wedder to reine Tobringers torüchstoopt. To’n Bispeel dat Enn A 105 för de Anbinnen an de A 111 in Richt Hamborg, dat eerst den nöördlichen Deel vun de Westtangent billn schüll.

Bit to de Düütschen Wedderverenigen harr de Autobahn de Beteken „A 13“.

Sünnerheiten[ännern | Bornkood ännern]

Mit Apenmaken vun de A 103 sünd an’n Rand vun de Autobahn – jüst as op’n Stadtring – mehrere Utbuchten mit Anholten för’n Busverkehr boet worrn, üm mit den Busbedrief in Konkurrenz to de Wannseebahn to gahn, de dormols vun de Düütschen Rieksbahn vun de DDR bedreven weer. Na de Wedderverenigen is de Busverkehr op de Stadtautobahn instellt un de Anholten sünd opgeven worrn. Deelwies weern se över Treppen un korte Footgängertunnels begahbor.

Weblenken[ännern | Bornkood ännern]

Commons-logo.svg Bundsautobahn 103. Mehr Biller, Videos oder Audiodateien to’t Thema gifft dat bi Wikimedia Commons.