Bruichladdich (Brenneree)

Vun Wikipedia
Bruichladdich

Brenneree Bruichladdich (Bild: Andrew Wood)

Land Schottland
Region Islay
Tyyp Malt
Status aktiv
Besitter Rémy Cointreau
Grünnt 1881
Grünner Robert, William un John Gourlay Harvey
Waterborn Born vun de Octomore Farm
Washstill(s) 2
Spiritstill(s) 2
Produkschoonsvolumen 1.500.000 l
Websteed www.bruichladdich.com

Bruichladdich [ˌbɹʊːɘχˈladi(ç)] is en Whisky-Brenneree in Bruichladdich op dat Eiland Islay, Schottland.

Historie[ännern | Bornkood ännern]

Islay un sien Brennereen

De Destille is 1881 vun de Bröder Robert, William un John Gourlay Harvey an’n Rand vun’n Loch Indaal, an’t Oostöver vun the Rhinnes, den westlichen Utlöper vun Islay, boet worrn. Dormols tell de Brenneree to de modernsten Destillen. En groten Deel vun de dormolige Utstatten warrt ok vundaag noch bruukt. In’n Gegendeel to de meisten annern Brennereen, de ut ümboete Buernhüüs entstahn sünd, weern Bruichladdich as Destille plaant un boet. De Hüüs weern üm en Hoff in de Mitt anleggt, woneem de Darr un en Dampmaschien to’n Stroomtügen stünnen.

In de Johren vun 1929 bit 1937 weer in de Destille keen Whisky herstellt. Dorna hett de Anlaag mehrmols den Besitter wesselt. Invergordon leet 1974 en poor wietere Brennblasen inboen, 1994 weer se wedder stillleggt, bit se in’n Dezember 2000 vun Mark Reynier un sien beiden „Murray McDavid“-Kollegen Simon Coughlin un Gordon Wright för 7.500.000 £ opköfft weer. Se hebbt de Destille vun Grund op renoveren laten. De viktoriaansche Utstatten is dorbi to wiete Deelen bibehollen worrn. De Redschoppen, Brennavens un Röhrleitungen weern ut’nanner nahmen un vun en Koppel vun Ingenieuren wedder nee tosamenboet.

Mark Reynier hett in’n März 2007 künnig doon, dat he ok de Brenneree Lochindaal, de al 1929 dicht maakt weer, wedder apen maken will[1]. In’n Juli 2012 is bekannt worrn, dat de Destille för 58.000.000 £ vun Rémy Cointreau övernahmen worrn is[2].

Produkschoon[ännern | Bornkood ännern]

Brennblasen un Spirit Safe vun Bruichladdich
Bruichladdich „Rocks“
Octomore Masterclass

De Brenneree tellt to dat schottische Whiskyrebeet Islay, se betütt ehr Water för de Produkschoon ut en Born op de Octomore Farm. In de Destille gifft dat en Meeschfatt vun 6,2 t un söss Gäärfatten vun tosmaen 210.000 l. Brennt warrt in twee wash stills vun tosamen 23.000 l un twee spirit stills vun tosamen 21.000 l, de mit Damp hitt maakt warrt. 2010 is en Lomond still ut de stillleggten Brenneree Inverleven dortokamen[3]. Siet Mai 2003 hett Bruichladdich en egene Affüllanlaag, so dat Bruichladdich de eenzige Destille op Islay is, de sülvst affüllt. Een Johr later is ok de egene Fattbinneree apen maakt worrn, siet Dezember 2004 produzeert de Brenneree ehr Molt ut Bio-Gassen vun Islay.

Bit to’n Stillleggen 1994 hett de Destille blots Molt ahn Törf för de Produkschoon bruukt. Vundaag gifft dat dorgegen en brede Reeg vun verscheden Affüllen mit un ahn Törf. En sünneren Whisky vun de Bruichladdich-Brenneree is de Octomore, de en wiet högeren Phenol-Andeel opwiest as all annern un sien Naam vun en fröhere Brenneree bi Port Charlotte (1816–1852) hett. 2009 is de Octomore 06.3 mit 258 ppm rutkamen, de söss- bit sövenmol so veel Phenol bargt as annere un dormit de törfigste Whisky weltwiet is.

Kiek ok[ännern | Bornkood ännern]

Literatur[ännern | Bornkood ännern]

  • Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
  • Walter Schobert: Das Whiskylexikon. Fischer Taschenbuch Verlag, Frankfort an’n Main 2003, ISBN 978-3-596-15868-3.

Borns[ännern | Bornkood ännern]

  1. http://www.bruichladdich.com/latestnewsarticles/portcharlottedistillery.htm
  2. http://www.bruichladdich.com/news/laddie-news/bruichladdich-remy-cointreau-agreement
  3. http://www.bruichladdich.com/the-botanist-islay-dry-gin/ugly-betty

Weblenken[ännern | Bornkood ännern]

Bruichladdich. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:55° 46′ N, 6° 22′ W