Bhekimpi Dlamini

Vun Wikipedia

Bhekimpi Alpheus Dlamini (* 26. November 1924 in’ Bezirk Hhohho; † 1. November 1999 in Mbabane) weer en swasiländsch Politiker un van 25. März 1983 bit 6. Oktober 1986 Premierminister vun Swasiland.

In‘ Tweeten Weltkrieg hett he in de Riegen vun de Allieerten Strietkräft kämpt. Dornah weer he Liddmaat vun den Swasiland Natschonalraat un hett in dat Departement vun den Premierminister arbeit. In de unruhig Tieden nah den Dood vun König Sobhuza II. stunn he up Siet vun de konservativ Liddmaaten binnerhalv vun de königlich Familie. As Prinz weer he buterdem Liddmaat in‘ Libandla, de beraden Versammlung vun den König, un in‘ Liqoqo (binner Raat ut föffteihn Liddmaaten vun de Königsfamilie un vun Stammeshööftlingen). De reformfründlich un süüdafrikafeendliche Lien vun Premierminister Mabandla Dlamini un vun de Regentin Dzeliwe gefull hüm nich. He hett sück dorum an den Stört vun disse Personen bedeeligt un wurr dorför mit dat Amt vun den Premierminister belohnt. He hett den Verdrag vun Nkomati mit Süüdafrika in dat Johr 1984 för good befunnen. As 1986 de nee König Mswati III. an de Macht keem, wurr he ut dissen Grund entlaaten, verhaft, wegen Verschwörung tegen de Interessen vun den Staat in‘ März 1988 to föffteihn Johren Gefängnis veroordeelt un keem in’t Gefängnis. Aber all in‘ Juli vun dat sülvig Johr keem he weer ut de Haft free.