Bexhöv
Bexhöv is en Dörp in de Gemeen Loxt in’n Landkreis Cuxhoben, Neddersassen. Dat Dörp hett so bi 2400 Inwahners. Bi dat Dörp höört ok de dree lüttjen Öörd Nückel, Junkernhose un Hosermühlen to.
[ännern] Geschicht
Al in de Steentied vör 12.000 Johr hebbt Minschen in de Ümgegend von Bexhöv leevt. Dat wiest Funnen von’n Rand von dat Steertmoor.
Toeerst in de Oorkunnen kummt de Oort in dat 12. Johrhunnert vör. 1180 hebbt se de eerste Kark boot. Ut Bexhöv stammt dat ole Adelsgeslecht von de Buxhoeveden. 1199 is Albrecht von Buxthoeven Bischop von Livland worrn un hett 1200 de Stadt Riga grünnt.
1974 denn is Bexhöv , dat al vörher Deel von de Samtgemeen Loxt aweer, bi de Gemeenreform in Neddersassen Deel von de Gemeen Loxt worrn.
De Oort hett vundaag ’n Charakter von en Vöroort mit veel Eenfamilienhüüs. En groten Deel von de Inwahners sünd Pendlers, de in Bremerhoben arbeiden doot. In’n olen Oort gifft dat noch welk Resthööv un an de Bundsstraat 71 en poor Gärtnereen. Sied en poor Johr gifft dat in Bexhöv keen Laden för Levensmiddel mehr. Blot noch en Gemischtworenladen, twee Tankstellen un een Slachter.
Bexhöv is de Oort, wo dat ole Määrken vun Haas un Swienegel toeerst speelt hett. Willem Schröder harr de Geschicht in Bexhöv in’n Kroog höört un ehr later to Poppeer bröcht. Dorbi hett he den Oort aver na Buxthuud ännert. Wohrschienlich weer de Grund, dat Buxthuud bekannter weer.
[ännern] Verkehr
Bexhöv liggt an de Bundsstraat 71, de dat Dörp mit Bremerhoben in’n Noordwesten un Bevers in’n Süüdoosten verbinnt. Ok de Landsstraat 135 löppt dör Bexhöv un geiht na Donnern un Zellst in’n Noordoosten un in’n Süüdwesten na Loxt un Ness.
De nächste Bahnhoff, an de Bahnlien Bremen-Bremerhoben, is in Loxt.
[ännern] Weblenken
- Websteed över Bexhöv (hoochdüütsch)
Koordinaten:53° 29′ N, 8° 42′ O
