Beverly Hills Cop

Vun Wikipedia
Filmdaten
Plattdüütsch Titel:
Originaltitel: Beverly Hills Cop
Düütsch Titel: Beverly Hills Cop – ich lös’ den Fall auf jeden Fall
Produkschoonsland: USA
Johr vun’t Rutkamen: 1984
Läng: 105 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Martin Brest
Dreihbook: Danilo Bach
Daniel Petrie Jr.
Produkschoon: Don Simpson
Jerry Bruckheimer
Musik: Harold Faltermeyer
Kamera: Bruce Surtees
Snitt: Arthur Coburn
Billy Weber
Szenenbild: Angelo P. Graham
Kledaasch: Tom Bronson
Dorstellers

Beverly Hills Cop (op plattdüütsch so veel as „Polizist vun Beverly Hills“; dt. Titel: Beverly Hills Cop – Ich lös’ den Fall auf jeden Fall) is de Titel vun en US-amerikaansche Action-Kummedie ut dat Johr 1984 vun den Speelbaas Martin Brest mit Eddie Murphy in de Hööftrull. Produzeert weer de Film vun Paramount Pictures un Eddie Murphy Productions. De Film harr an’n 5. Dezember 1984 in de USA sien Premiere un keem in Bundsdüütschland an’n 3. April 1985 in de Kinos. In de DDR weer he eerst 1987 wiest. De Film gellt hüüt as Klassiker vun de 1980er Johren.

Inholt[ännern | Bornkood ännern]

Axel Foley is en Polizist in Detroit, de jümmer wedder dör snaaksche Akschonen opfallt, de he op egen Fuust maken deit. Dat sien Baas em noch nich vör de Döör sett hett liggt aleen doran, dat Foley en bannig go’en Polizist is. Een Avend töövt sien ollen Fründ Mikey op em, nadem he en Haftstraaf afsetten un en half Johr lang in Beverly Hills arbeit hett. De hett en grote Mengde düütsche Schuldverschrieven bi sik. Man, jemehr Drapen hollt nich lang an: Wiel Foley daalslahn warrt, bringt twee Opdragsmöörder Mikey vör Axel sien Ahnung üm.

Ofschoonst Axel sien Baas em ünnerseggt, in den Fall to ermiddeln, nimmt sik Axel to’n Schien Urlaub un föhrt op egen Fuust na Beverly Hills, üm dor wat över den Moord ruttofinnen. Sien eenzige Spoor föhrt na dat Kunstatelier vun Victor Maitland, woneem ok sien olle Fründin Jenny arbeit. As he bi Maitland nafraagt, warrt he teemlich gau vun den sien Mackers rutsmeten un lannt kort later bi de Polizei vun Beverly Hills. Dor warrt de beiden Detectives Taggart un Rosewood op em Ansett, vunwegen dat Axel sien Baas al Bescheed geveen hett, wat för’n Dwarsdriever Axel mitünner is. Man, Axel hett dat mit sien Oppassers teemlich licht. In’n Gegendeel to em sülvst, hollt de sik jümmers nipp un nau nan de Vörschriften. Un jeed mol, wenn Axel jem wedder verlaadt hett, kriegt de beiden Arger vun jemehrn Baas Lt. Bogomil.

In de rieken Welt vun Beverly Hills kann Foley mit sien unkonventschonell Vörgahn bald rutfinnen, dat de feine Atelierbesitter Maitland blangento ok noch in’n groten Rahmen mit Ruuschgift hannelt. Ok de Weertpaperen, Mikey mit na Detroit bröcht harr, weern Smuggelwoor. Dat weer ok de Grund för den Moord. Ofschoonst Axel mit de Tiet ok de Polizisten vun Beverly Hills övertügen kann, dat Maitland Dreck an’n Hacken hett, sütt sik Lt. Bogomil nich in de Laag, wat to ünnernehmen, vunwegen dat keen Bewiesen vörliggen doot. Na all den Schandaal, den Axel in de Stadt maakt hett, wiest de Polizei-Baas an, dat Foley de Stadt verlaten mutt.

Op’n Weg kann Foley aver Rosewood betüdeln, dat he tosamen mit Jenny un em na Maitland sien Lagerhuus föhrt, üm dat to ünnersöken. Rosewood töövt buten, as Jenny un Axel Drogen in dat Lager finnt. Man, ok Maitland is mit sien Mackers dor un lett jem fangen setten. Jenny warrt in Maitland sien Villa bröcht, wiel Axel in’t Lagerhuus misshannelt warrt un ümbröcht warrn schall. Rosewood kann em aver rechttietig befre’en un de Mackers vun Maitland utschalten.

Mit Hülp vun Taggert maakt se sik op’n Weg na Maitland sien Villa, üm Jenny to redden. In dat Huus kummt dat to en Scheteree un Foley warrt anschaten. An’t Enn kriggt he aver Maitland tofaten un schüüt em dood. Ok Bogomil sülvst grippt in den Insatz in. Opletzt warrt de nödigen Bewiesen för Maitland sien Schuld sekerstellt un Bogomil verklort sien Polizei-Baas, wat sik in de Villa afspeelt hett – ahn dorbi akkerat bi de Wohrheit to blieven, as de Deenstvörschriften dat seggen doot. Op disse Wies blifft Axel sien Akschoon op egen Fuust ahn Folgen.

Kritik[ännern | Bornkood ännern]

Dat Lexikon vun’n internatschonalen Film schreev vun en turbulente Mischen ut Klamotte un Action-Krimi ahn hoge Anspröök. De Film weer halfwegs routineert inszeneert, mitünner snaaksch övertagen un an eenige Steden sogor zynisch un mit diskrimiren Momenten[1].

Utteken[ännern | Bornkood ännern]

De Film weer tosamen för acht Filmpriesen vörslahn, ünner annern ok för den Oscar in de Best Originaldreihbook. Utteken weer de Film mit dree Priesen:

  • 1985: mit den Stuntman Award in de Kategorie Best Fohrtüüch-Stunt för Eddy Donno
  • 1985: mit den People’s Choice Award in de Kategorie Leefste Film
  • 1986: mit den Grammy in de Kategorie Best Album vun en Original-Filmmusik för Harold Faltermeyer un annere

Produkschoon[ännern | Bornkood ännern]

De Dreiharbeiten to den Film füngen den 14. Mai 1984 an un weer mit 15 Million US-Dollars ansett. Dreihöörd weern ünner annern Beverly Hills, Pasadena un Hollywood in Kalifornien, aver ok in Detroit un Dearborn in Michigan. Inspeelt hett de Film alleen in de USA 235 Millionen US-Dollars, weltwiet weern dat 316 Millionen.

De Rull Axel Foley schüll toeerst vun Sylvester Stallone speelt warrn. Dorför müssen egens tallrieke Actionsszenen tosätzlich in’t Dreihbook inarbeit warrn. Dordör weer dat plaante Budget op ruchweg 20 Millionen US-Dollar anstegen, wat dat Studio aver nich betahlen wull. Stallone wull dorgegen nich ahn gröttere Action-Szenen dreihn, so dat Stallone nich mehr as Hööftdorsteller in Fraag keem. An sien Steed keem Eddie Murphy un de düren Action-Szenen in’t Dreihbook weern dör Kummedie-Elementen uttuuscht.

Dat Filmset, dat de Polizei-Büro vun Beverly Hills dorstellt, is op Grundlaag vun’t NORAD-Kontrollzentrum ut den Film WarGames opboet worrn. Speelbaas Martin Brest harr dat Set al för WarGames mitutklamüstert, weer denn aver dör en annern Speelbaas uttuuscht.

De düütschen Schuldverschrieven, de in’n Film wiest warrt, wiest den Opdruck 10,000 Mark, wat op twee Orden nich mööglich is: To’n een warrt en Komma as Dusenderteken bruukt an Steed vun en Punkt, as dat in Düütschland begäng is – de Weert weer also egentlich blots 10 ansteed vun 10.000. To’n annern weer de Beteken Mark blots in de DDR begäng – in de Bundsrepubliek weer de offizielle Beteken Düütsche Mark.

Finanziell weer de Film en groten Spood. In’t Johr 1987 is mit Beverly Hills Cop II en tweeten Deel rutkamen, de jüst so goot ankamen is. De drüdde Film Beverly Hills Cop III is 1994 mit en kumplett nee Produzentenkru dreiht worrn, künn aver nich mehr an den fröheren Spood rankamen.

Borns[ännern | Bornkood ännern]

  1. Filmkritik in’t Lexikon vun’n internatschonalen Film, afropen an’n 28. Januar 2010

Weblenken[ännern | Bornkood ännern]