Because I Said So
| Filmdaten | |
|---|---|
| Plattdüütsch Titel: | — |
| Originaltitel: | Because I Said So |
| Düütsch Titel: | Von Frau zu Frau |
| Produkschoonsland: | USA |
| Johr vun’t Rutkamen: | 2007 |
| Läng: | 97 Minuten |
| Originalspraak: | Engelsch |
| Öllersfreegaav in Düütschland: | FSK ahn Inschränken |
| Filmkru | |
| Speelbaas: | Michael Lehmann |
| Dreihbook: | Karen Leigh Hopkins Jessie Nelson |
| Produkschoon: | Paul Brooks Michael Flynn Jessie Nelson Scott Niemeyer Norm Waitt |
| Musik: | David Kitay |
| Kamera: | Julio Macat |
| Snitt: | Paul Seydor Troy Takaki |
| Dorstellers | |
| |
Because I Said So (op Platt so veel as „As ik dat so segg“; dt. Titel: Von Frau zu Frau) is en US-amerikaansche Filmkummedie vun Michael Lehmann ut dat Johr 2007.
Inholt[ännern | Bornkood ännern]
Daphne is Mudder vun dree Döchter: Maggie, Mae un Milly. Siet eenige Tiet is se all vun ehrn Mann scheedt, vun wegen dat jemehr Eh nich dull loppen is un he nienich Tiet för sien Fro harr un ehr ok nich richtig leef harr. To’n Anfang vun’n Film warrt de Hochtieten vun Maggie un dorna vun Mae wiest, man bi Milly will dat mit de Leev nich so recht klappen. Un so warrt Daphne bilütten bang, dat Milly keen Mann afkriggt, un versöcht nu för Gewalt een för ehr Dochter to finnen. In’t Internett gifft se för Milly en Bekanntshaftsanzeige op un dröpt sik denn mit de Kandidaten in en Restaurant, üm den – wat se meent – richtigen richtigen för ehr uttosöken. Ehr Wahl fallt op den Architekt Jason, denn se ehr nu smackhaft maken un opdrammen will. All de Drapens hett de Musiker Johnny beobacht, de in dat Restaurant Musik speelt. He snackt mit Daphne un sleiht sik dorpohen sülvst as Kandidat vör. Dorvun will Daphne aver nix weten, vun wegen dat se Vöroordelen hett un em as Musikanten nich troet. As Johnny denn gahn will, nimmt he sik een vun de Millys gewarflichen Visitenkoorten mit, de ehr Mudder op’n Disch liggen hett.
Milly hett’n Catering-Service, un Jason gifft ehr’n Opdrag för sien Firma, üm mit ehr in Kuntakt to kamen, ahn dat se wat vun de Anzeige vun ehr Mudder spitz to kriegen. Wohrhaftig kamt se in’t vertellen und maakt för later en Drapen af. Intwüschen hett aver ok Johnny Kuntakt to ehr opnahmen un ok mit em geiht dat gau vöran, dat se sik goot verstaht un lieden künnt. Man, Milly is sik nich seker und will ok ehr Mudder nich vör’n Kopp stöten, de natürlich jümmer vun Jason schwärmt. Also dröpt Milly sik mit beide Mannslüüd.
Wiel nu Jason op de Geboortsdagsfier vun Daphne Milly mehr oder minner apentlich en Andrag maakt un verkünnt, dat he ehr sien Öllern vörstellen will, föhlt sik Milly aver mehr na Johnny hentogen. Tofallig drapt ’n beten later ok Johnnys Vadder Joe un Daphne tohopen, un ok twüschen de beiden bahnt sik wat an, dat ok se sik nu fakener drapen doet. Nu finnt Johnny aver rut, dat Milly sik noch mit annerseen dröpt un maakt dorophen Sluss mit ehr, vun wegen dat he sik bedragen föhlt.
As denn aver Milly ok noch wies warrt, dat ehr Mudder den Kuntakt to Jason över en Internettanzeige in de Weeg leidt hett, warrt ok se böös. Foorts maakt se en Enn mit ehr Anbanneln mit Jason, as ehr klor warrt, dat he nich de richtige för ehr is. As se denn vun ehr Mudder weten will, wat ehr infallt, so wat to maken, kummt se jüst to en Tiet, as se mit Joe an’n Gang is. Nu sitt se eerstmol allen dor un brickt ok den Kuntakt mit ehr Mudder af, vun wegen, dat se bannig dull op ehr is wegen ehr anduern Versöken, en Mann för ehr to finnen. Daaglang snackt se nich mehr mit ehr.
Opletzt sütt Daphne in, dat se’n Fehler maakt hett mit ehr Akschoon, un ok, dat se’n verkehrte Ansicht över den Musiker Johnny harr. Se snackt dorophen noch mol mit Johnny un gifft to, dat dat allns ehr Schuld weer. He geiht denn ok wirklich na Milly hen un de beiden finnt wedder toenanner. To’n Enn vun’n Film hett nich blots Milly ehr Glück funnen, man ok ehr Mudder, de nu Joe heiraadt un mit em allns nahollt, wat se mit ehrn eersten Mann nich beleeft hett.
Kritiken[ännern | Bornkood ännern]
James Berardinelli schreev op ReelViews, dat de Film en „op Bestellen maakte romantische Kummedie vun’n Tyyp B“ weer. De Anwennen vun en Formel weer nich verkehrt, wenn dat Dreihbuch minimale Intelligenz wies, de Figuren fein antokieken weern un de Chemie twüschen de Hööftdorstellers stimmt – Kriterien, de disse Film „to’n Glück“ opwiest.[1]
Lisa Schwarzbaum schreev in Entertainment Weekly vun’n 31. Januar 2007, dat de „sluddrige“ Kummedie keen Charme hett. De Dreihbookschrievers weern vun’t Thema Orgasmus beseten.[2]
Utteken[ännern | Bornkood ännern]
De Film hett keen bedüden Priesen wunnen. Alleen een Nomineeren hett dat för den Film geven: Diane Keaton weer as Slechtste Schauspelersche för de Goldene Himbeer vörslahn.
Anners wat[ännern | Bornkood ännern]
De Film is in Los Angeles dreiht worrn[3]. Weltwiet hett de Film üm un bi 69,5 Millionen US-Dollar inspeelt[4]
Borns[ännern | Bornkood ännern]
- ↑ Kritik vun James Berardinelli, afropen an’n 28. Juli 2007
- ↑ Kritik vun Lisa Schwarzbaum, afropen an’n 28. Juli 2007
- ↑ Filming locations für Because I Said So, afropen an’n 28. Juli 2007
- ↑ Box office / business för Because I Said So, afropen an’n 21. Juni 2009
Webkenken[ännern | Bornkood ännern]
- Because I Said So in de Internet Movie Database (engelsch)
- Kritiken to’n Film op Rotten Tomatoes