Bundsstraat 73

Vun Wikipedia
(wiederwiest vun B 73)
Bundesstraße 73
Bundesstraße 73
Basisdaten
Längd alltohoop: ca. 100 km
Bundslänner: Neddersassen
Hamborg
Grundricht: West-Oost
Koort
Verloop von de Bundsstraat 73
Verloop von de Bundsstraat 73
Verloop von de Bundsstraat 73
De B 73 in Oterndörp
De B 73 (Buxthuer Straat) in Horborg

De Bundsstraat 73 is ene Bundsstraat in Düütschland, de vun Cuxhoben bet na Hamborg geiht un üm un bi 100 Kilometer lang is.

Verloop[ännern | Bornkood ännern]

De Straat fangt bi Olenwoold in’n Landkreis Cuxhoben an de Autobahn 27 an un löppt denn in en Bagen dör Cuxhoben, raakt in Groden wedder an de A 27 un löppt denn na Oosten an Oterndörp langs un na Neehuus. Dor dreiht de Straat denn na Süüdoosten, löppt dör Kumbarg na Hemmoor/Warstood/Basbeek, drippt dor op de Bundsstraat 495 un geiht denn bi Heckthusen över de Oostbrügg Heckthusen över de Oost. Dor fangt de Landkreis Stood an. De Bundsstraat geiht denn dör Himmelpoorten un an Stood langs. Bi Ottenbeek münnt de Bundsstraat vondaag in de A 26. De ole Verloop von de Straat geiht över en Affohrt över de Öörd Gothenborg un Hornborg na Buxthu. Bi Öbergünn geiht na Süden de B 3 von de B 73 af un kort vör Vosshusen na Noorden de B 3n. De B 73 löppt denn dör Neegraven un Huusbrook un is dor an de A 7 anslaten. De B 73 ennt denn in Horborg bi de B 75/A 253.

Historie[ännern | Bornkood ännern]

Inricht worrn is de Straat 1932 as Rieksstraat 73.

Op de Bundsstraat 73 is jümmer temlich veel Verkehr, so 30.000 bet 40.000 Wagen jeden Dag, un de Straat is ok jümmer en beten gefährlich. So geev dat vun 1995 bet 2000 71 Unfäll mit 82 Swoorverletzte un twölf Dode. Dorüm warrt nu de Autobahn 26 twischen Hamborg un Stood boot, de den Verkehr vun de B 73 opnehmen schall.

Ümgehungsstraten[ännern | Bornkood ännern]

De 5,3 Kilometer lange Ümgehungsstraat för Buxthu is von 1958 bet 1962 boot un an’n 26. Mai 1962 von Verkehrsminister Hans-Christoph Seebohm inwieht worrn.[1] Se hett 9,2 Milljonen DM köst un geiht in’n Süden von’n Oort üm Ooldklooster rüm mit en Brügg över de Eest.[1] Vörher güng dat över Stoder Straat, Bahnhoffstraat, Lange Straat un Horbörger Straat dör de Binnenstadt von Buxthu. De Spannbeton-Brügg över de Eest schall 2015 bet 2018 nee boot warrn. De ne’e Brügg warrt 52 Meter lang un schall üm un bi 4,3 Milljonen Euro kösten.[1]

In Hornborg lööp de Straat fröher över Vördamm, Lange Straat, In’n Groten Sand un Stoder Straat, bet se mit en ne’e Brügg över de Au un in’n Westen von’n Oort langs leggt worrn is.

1955 bet 1957 keem de Ümgehungsstraat för Stood von de Krüzung mit de Bundsstraat 74 bi’n Swarten Barg mit en Brügg över de Swing bet na de Horbörger Straat bi Ottenbeek (nu Opfohrt 2 Stood-Süüd op de Autobahn 26). Vörher güng de Straat över Bremervörer Straat, Schipperdoorstraat, Wallstraat un Horbörger Straat.

In Bornbarg hett de B 73 fröher en scharpe Kurve hatt. Üm de Kurve en grötteren Radius to geven, is 1960 dat Gasthuus Freudenthal (vondaag Zur Linde) afreten un en Stück weg wedder opboot worrn. De Boarbeiden in Bornbarg weren 1962 trech.[2]

In Hemmoor lööp de Bundsstraat fröher dör de hüdige Straat An de Heid, is denn aver von de Krüzung mit de Bundsstraat 495 bet na de Krüzung mit de Schützenstraat ümleggt worrn.

In Neehuus güng der Straat fröher von Dingwöörden över de Stoder Straat merrn dör den Oort un över de Slüsenstraat wedder rut. Na dat Plaanfaststellungsverfohren 1958 is von 1959 bet 1963 en Ümgehungsstraat boot worrn, de in’n Westen üm’n Oort rüm geiht. De Straat hett 7 Milljonen Mark köst.[2]

För de enge Oortsdörfohrt Belen is 1954 en Plaanfaststellungsverfohren maakt worrn un 1956 weer de ne’e Straat, de en Stück wieder in’n Westen liggt, denn trech.[2]

De Ümgehungsstraat för Oterndörp in’n Süden von’n Oort mit Brügg över de Medem is von 2007 bet 2009 boot worrn un hett 21 Milljonen Euro köst.[3] As de B 73 noch dör dat Zentrum von Oterndörp güng, sünd in de Johren 1954 bet 1968 en ganze Reeg Hüüs in de Reichenstraat afreten worrn, üm Platz för’n Utbo von de Straat to maken.[4]

In Olenbrook güng de B 73 fröher över de Lange Straat un den Olen Weg merrn dör den Oort. 1965/1966 is dor en Ümgehungsstraat boot worrn, de in’n Westen üm’n Oort rüm geiht.[2]

Von dat Westerenn von Olenbrook güng de B 73 fröher över de Cuxhobener Schossee dör dat Zentrum von Groden un över de Papenstraat bi de Nedderelvbahn in’n Noorden von Groden wedder an’n hüdigen Verloop ran. As de Autobahn 27 boot worrn is, is de B 73 in’n Oosten üm Groden rüm ümleggt worrn. Dat Enn von de A 27 is dor över en Kreisverkehr an de B 73 anbunnen worrn.

Footnoten[ännern | Bornkood ännern]

  1. a b c Björn Vasel: Vom Abriss und Neubau der B73-Brücke, Stader Tageblatt an’n 14. April 2016
  2. a b c d Rudolf Lembcke: Kreis Land Hadeln. Geschichte und Gegenwart. Rutgever: Landkreis Land Hadeln. Bookdruckeree Günter Hottendorff, Oterndörp 1976, Sied 153
  3. Frauke Heidtmann: Großer Tag für Otterndorf, Niederelbe-Zeitung an’n 12. Dezember 2009
  4. Rudolf Lembcke: Kreis Land Hadeln. Geschichte und Gegenwart. Rutgever: Landkreis Land Hadeln. Bookdruckeree Günter Hottendorff, Oterndörp 1976, Sied 154

Weblenken[ännern | Bornkood ännern]

Bundsstraat 73. Mehr Biller, Videos oder Audiodateien to’t Thema gifft dat bi Wikimedia Commons.