Arteria thoracica interna

Vun Wikipedia
Wesseln na: Navigatschoon, Söök
Arterien vun de vörderen Rumpwand

De Arteria thoracica interna („binnere Bostkastenslagader“) is en Slagader, de vun de Arteria subclavia aftwiegt. Se kummt kranial vun’t Hart tostannen un tütt denn in de Bosthöhl na kaudal, wobi se neeg dat Bostbeen löpt.

Ok wenn dat nich mit de Pariser Nomenklatur övereenstimmt, warrt de Arteria thoracica interna af un to ok Arteria mammaria interna nöömt. In’t Krankenhuus warrt faken ok de Afkörten IMA bruukt, de ut de engelschen Nomenklatur (internal mammary artery) kummt. Sünners in’t Rebeet vun de Bypass-Chirurgie warrt de Afkörten bruukt. Dorut folgt ok de bruuk vun de Begrepen left internal mammary artery (LIMA) un right internal mammary artery (RIMA).

Ut de A. thoracica interna twiegt in jedeen Twüschenrippenruum de Arteriae intercostales anteriores af, de bi Beester as Arteriae intercostales ventrales betekent warrt. Se verloopt in jemehrn Twüschenrippenruum na achtern un versorgt dor de Muskulatur mit suerstoffriek Blood. Op Hööch vun de Mitt vun’n Bostkasten deelt sik de A. thoracica interna op in de Arteria musculophrenica, de dat Dweerfell versorgt, un de Arteria epigastrica superior (bi Beester Arteria epigastrica cranialis). Disse stött dör de Bostwand un verlöpt denn in de Rektusscheed na kaudal. Se versorgt de Buukwand un billt Anastomosen mit de Arteria epigastrica inferior, de vun de Arteria iliaca externa aftwiegt.

Literatur[ännern | Bornkood ännern]

  • Uwe Gille: Herz-Kreislauf- und Abwehrsystem, Angiologia. In: Salomon, F.-V. u. a. (Rgv.): Anatomie für die Tiermedizin. Enke-Verlag, Stuttgart 2004, S. 404-463. ISBN 3-8304-1007-7