Arteria spinalis anterior

Vun Wikipedia
Schemaatsch Dorstellen vun de Arterien an de Bregenünnersiet. De Arteria spinalis anterior is ünnen to sehn.

De Arteria spinalis anterior („vördere Rüchmarksarterie“) is de gröttste Arterie to’n Versorgen vun’t Rüchmark. Se löpt as unpoor, also blots eenmol in ’n Lief vörkamen Bloodfatt an de vörderen Siet vun’t Rüchmark in’n Warvelkanal. Bi de Beester liggt se entspreken an de Ünnersiet vun’t Rüchmark un warrt dor as Arteria spinalis ventralis betekent.

Verloop[ännern | Bornkood ännern]

De A. spinalis anterior in situ vör dat Rüchmark

De Arteria spinalis anterior entsteiht ut de beiden Warvelarterien (Arteria vertebralis) in Hööch vun de Pyramidenbahnkrüzen (Decussatio pyramidum) un lööpt an de Fissura longitudinalis anterior an de vörderen Siet vun’t Rüchmark na ünnen (kaudal). De Arteria spinalis anterior kriggt Toloop nich blots direkt över ehr egen Aftwiegen man ok vun tallriek segmentaal Twiegen vör allen vun dree Arterien, neemlich de Warvelarterien in’t Rebeet vun de Halswarvelsüül, vun de Twüschenrippenarterien (Arteriae intercostales) in’t Rebeet vun de Bostwarvelsüül un vun de Lumbalarteiren (Arteriae lumbales) in’t Rebeet vun de Lennenwarvelsüül. De Twiegen warrt as Rami spinales (Eentall: Ramus spinalis).

Över tallriek Twiegen, de üm dat Rüchmark rümlopen doot, billt de Arteria spinalis anterior Anastomosen mit de beiden Arteriae spinales posteriores, de an de Achtersiet vun’t Rüchmark lopen doot. Disse Twiegen künnt as wieteren Verloop vun de Rami spinales ansehn warrn, sünd aver nich na Segmenten indeelt un wesselt ok in jemehrn Afstand.

Krankheiten[ännern | Bornkood ännern]

Wenn de A. spinalis anterior in’n Fall vun en Thromboos oder Embolie verslaten warrt, kummt dat to en Ischämie un in de Naklapp to Utfalleffekten in de Rebeeten de vun de Arterie versorgt warrt. Dat Krankeitsbild warrt as Arteria-spinalis-anterior-Syndrom betekent.

Borns[ännern | Bornkood ännern]

  • J. Fanghänel (Rtg.): Waldeyer Anatomie des Menschen. de Gruyter 2003, 17. Oplaag, S. 450. ISBN 3-11-016561-9
  • Trepel, Martin: Neuroanatomie. Struktur und Funktion, 3. Opl., München/ Jena 2004, S. 96-97. ISBN 3-437-41297-3