Arjuna-Asteroid

Vun Wikipedia
De Asteroid 2002 AA29 vun’n Aten-Tyyp höört to de Arjuna-Asteroiden. He bewegt sik op en Hoofiesenbahn

Arjuna-Asteroiden billt en Koppel vun Asteroiden, de to de eerdnegen Asteroiden (eng.: near-earth asteroid, kort: NEA) höört.

Dat tyypsche för disse Objekten is, dat se Bahnen hebbt, de meist so as de Eerdbahn sünd. Se wiest en lütte Bahnnegen op, hebbt en lütte Exzentrizität un bruukt vör een Ümloop ruchweg een Johr. Disse Egenschoppen föhrt dorto, dat de Asteroiden vun disse rore Klass mit teemlich wenig Opwand (Δv) vun de Eer ut anflagen warrn künnt.

Wat nu nipp un nau to de Arjuna-Asteroiden höört, is nich scharp fastleggt. To de Koppel tellt Asteroiden vun all dree Klassen, de ünner de eerdnegen Objekten begäng sünd, also Amor-, Apollo- un Aten-Asteroiden. Man, anners as disse dree Tyypklassen, ist de Arjuna-Klass nich na en Asteroiden nöömt. Se hett ehrn Naam vun en Figur ut de hinduistischen Mythologie. Dor is Arjuna de Söhn vun den Himmelsgott Indra un de Königin Kunti.