Arabesque (Film)

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Arabesque
Düütsch Titel: Arabeske
Produkschoonsland: USA
Johr vun’t Rutkamen: 1966
Läng: 101 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Stanley Donen
Dreihbook: Julian Mitchell
Stanley Price
Peter Stone
Produkschoon: Stanley Donen
Denis Holt för
Universal Pictures
Musik: Henry Mancini
Kamera: Christopher Challis
Snitt: Frederick Wilson
Dorstellers

Arabesque is de Titel vun en US-amerikaanschen Speelfilm ut dat Johr 1966. De Film is en Mischen ut Thriller un Kummedie. He baseert op den Roman The Cipher vun Gordon Cotler.

Inholt[ännern | Bornkood ännern]

De US-amerikaansche Professer David Pollock lehrt an de University of Oxford in Grootbritannien. He is en Fackmann för Schriften ut dat Öllerdom un kriggt een Dag vun den tweedüsteren Major Sloane en Anbott, en hethitische Schrift to översetten. Pollock lett sik von dat Geld aver nich locken un seggt em af. Korte Tiet later warrt he vun Hassan Jena, den Premierminister vun en nich neger betekenten araabschen Staat, de sik inkognito in England ophollt, üm en Gefallen beden. He schall för em den Reder Nejim Beshraavi utspioneeren. De schall an den Plaan vun en Staatsstriek bedeeligt wesen un Sloane is angeevlich een vun sien Lüüd. Pollock lett sik dorop in un seggt to, dat Schriftstück gegen 30.000 Dollar in Beshraavis Stadtvilla to Dechiffreeren. Sünenrs macklich hett he dat dor al so nich, man dat warrt noch dramaatscher, as de Leefste vun Beshraavi, Yasmin Azir, em mitdeelt, dat sien Opdraggever em ümrbigen laten will, wenn he mit sien Arbeit fardig is. As Pollock nu Gewahr warrt, dat he in en Fall sitt, nimmt he den Zedel mit de Logogrammen an sik un neiht mit Yasmin ut, de so deit as weer se sien Börgsche.

De beiden warrt dör den Londoner Zoo verfolgt, woneem Pollock un Yasmin op den CID-Agenten Webster drappt, de jem vör den gefährlichen Macker vun Beshraavi in Sekerheit bringt. Man, dat duert nich lang, bit sik rutstellt, dat de Agent en Helpsmann vun Yussuf Kasim is, en Wedderstandskämper un Gegner vun Beshraavi, de jüst so en undörsichtig Speel maakt. In en Leverwagen warrt Pollock vun Kasims Lüüd ünner Drogen sett, dormit he veraat, woneem dat Schriftstück to finnen is. Un ogenschienlich maakt Yasmin mit jem gemeensome Saak. Man, ut Pollock is nix ruttokriegen, un so sett se em opletzt op en stark befohrene Straat buten vun London ut. Ofschoonst he kuum bi Sinnen is, kumm he mit hele Huut dorvun af. An’n nächsten Dag besöcht Yasmin em in sien Wahnung, de mit Utflüchten versöcht, dat Vertroen vun Pollock torüch to winnen.

Webster finnt nu den Zedel in den Leverwagen vun Kasim un wennt sik denn aver eerstmol an Beshraavi, üm för sik mehr Geld rutohollen. Mit em maakt he en Drapen in Ascot ut. woneem de Zedel övergeven warrn schall. Dor kann Pollock na en risch Akschoon op de Peerrennbahn den Zedel wedder in sien Besitt bringen. Webster warrt dorbi aver in’t Gewöhl vun Sloane doodsteken. An sik wull he Pollock utschalten, man de warrt dorna nu as Mörder vun de Polizei söcht. As sik de Professer över Yasmin kunnig maakt, stellt he fast, dat nich allens stimmt, wat se em vertellt hett un he kriggt wedder Bedenken, ehr to vertroen. In London warrt de beiden vun Kasim ünner en Vörwand op en verlaten Bosteed lockt, woneem he versöcht jem ümtobringen. Pollock un Yasmin kamt jüst so even mit jemehr Leven dorvun, Kasim sülvst blifft dör en Stroomslag doot.

En Dag later stellt sik rut, dat de Schriftteken blots en eenfachen Kinnerreem dorstellt, man op den Originalzedel in Mikroschrift noch en geheeme Inschrift to finnen is. Dorna schall noch an’n glieken Dag en Anslag op den Premierminister Jena veröövt warrn. Jena gifft an’n Flaaghaven vun London to’n Optakt vun sien Staatsbesöök en Pressekunferenz af, also versöökt Pollock un Yasmin rechttietig dorhen to kamen. Wohrhaftig warrt op den Premierminister schaten, kann aver dör jemehr Ingriepen jüst noch rett warrn. Dat hollt aver nich lang vör, as Jena korte Tiet later vun en vun sien Begleiders dootschaten warrt.

Yasmin, de sik nu sülvst as Agentin vun Jena rutstellt, kann dör en Feernsehopteken rutfinnen, dat de echte Premierminister na sien Lannen dör en Dubbelgänger uttuscht worrn is. De harr alleen de Opgaav, en verkehrte Pressemitdelen vörtolesen, üm en Verdrag to hinnern, de Beshraavi finanziell ruineert harr. De echte Jena is aver roovt worrn un warrt in en Kist versteken. Pollock un Yasmin künnt em aver in en Leverwagen utfinnig maken un befre’en. As se mit den Wagen op’n Landsitt vun Beshraavi ankamen sünd, neiht de dree ut, warrt aver op’n Koornfeld vun’n Meihdöscher jaagt. Mit Peerd versöökt se denn wegtokamen. Beshraavi un Sloane verfolgt jem denn mit’n Heevschruver un Jena warrt dör en Kugel an’n Arm drapen. Mit letzte Kraft künnt sik de dree op en stillleggte Brüch redden. Dor kann Pollock den Heevschruver mit en afsmeten Ledder to’n Afstörten bringen. Un so geiht an’n Enn allens goot ut.

Kritik[ännern | Bornkood ännern]

Utteken[ännern | Bornkood ännern]

De Film Arabesque is 1967 mit den BAFTA Award in de Kategorie Best britische Kameraföhren (Klöör) uttekent worrn, den Christopher Challis wunnen hett. Nomineert weer he noch för veer wietere Priesen.

Anners wat[ännern | Bornkood ännern]

  • De Butenopnahmen sünd ünner annern in Ascot (England) un an’t Crumlin Viaduct in Caerphilly (Wales) dreiht worrn.
  • De männliche Hööftrull schüll toeerst Cary Grant spelen. Jümmer wenn Peck de Kummedie-Szenen nich so recht op’n Punkt bröcht hett, segg he to’n Spaaß: “Remember, I’m no Cary Grant” („Denk doran: Ik bün keen Cary Grant“).
  • Peck harr dat swor bi de Stunt-Szenen vun wegen en olle Beenvesehren. In de Szeen in’t Koornfeld hett he sien Partnersche Sophia Loren fraagt, dat se langsomer rieden schüll, anners seh dat so ut as wenn se em Redden de un nich anners rüm.

Weblenken[ännern | Bornkood ännern]