Antiochos vun Askalon

Vun Wikipedia
Wesseln na: Navigatschoon, Söök

Antiochos vun Askalon (Ooldgreeksch: Ἀντίοχος Antíochos; * twuschen 140 un 125 v. Chr. in Askalon; † gegen 68 v. Chr. in Mesopotamien) is en antiken Philosophen in de Tied vun den Hellenismus.

He is na Athen hengahn un dor in Plato siene Akademie inträen. Dat weer dormols in de leste Tied vun de so nömmte „Jüngere Akademie“. In de Johre speel de Skeptizismus dor en tämliche Rull. Mit de Tied wenn he sik avers ganz vun den Skeptizismus af. Dor is he denn um ut de Akademie utträen un hett siene egen School grünnt. He hett dat to'n Programm maakt un siene School „Ole Akademie“ nömmt. Dor woll he mit utdrücken, datt he torüchkamen weer to den wohren Platonismus, de vun de Skeptikers in de Jüngere Akademie verlaten wurrn weer.

Antiochos is de „Huusphilosoph“ vund en röömschen Politiker un Feldherrn Lucullus ween, un is mit em gahn up en Reis na Noordafrika un up en Feldtog na Armenien. Mank siene Hörers sund de beröhmten Römers Varro un Cicero ween. Nadem de Jüngere Akademie in de achtiger Johre vun dat 1. Johrhunnert v. Chr. unnergahn weer, hett blot noch siene School dat Arv vun Plato siene Traditschoon in Athen hooch holen. Man as he doot bleven weer, is ok siene School na um un bi 20 Johre verswunnen.

Ofschoonst he veel up Plato siene Traditschoon geven dö, dach he mehr in de Gemarken vun de Stoa, as vun den Platonismus. Sunnerlich hett he Plato siene Lehr vun de Transzendenz susen laten un hett en Lehr vun de Natur upstellt, de slankweg materialistisch ween is.