Annemarie Jensen

Vun Wikipedia

Annemarie Jensen (borene Siegfriedt[1]; * 30. Mai[2] 1940 in Sillerupfeld) is en plattdüütsche Schrieversche.

Jensen is 1940 op en Buurnhoff in Sillerupfeld boren un dor ok opwussen.[3] Se güng in Sillerup op de Volksschool un denn na Flensborg op de hoge School.[1] Dor hett se ehr Abitur maakt.[1] Se hett denn Medizin an de Universitäten Freiburg un Kiel studeert un 1968 mit en Dokterarbeid över dat Thema Über den Calcium-Gehalt und den 45Calciumaustausch in Längsmuskulatur des Meerschweinchendünndarms[4] bi Heinz Lüllmann ehren Dokter med. maakt.[1] Na dat Studium weer se toeerst wetenschopliche Anstellte bi de Chirurgsche Universitätsklinik Kiel[5] un hett later 28 Johr as Narkoosdokter bi de Diakonissenanstalt Flensborg arbeidt.[1] 2005 is se in Ruhestand gahn.[1] Se leevt in Flensborg.[6]

1999 hett Jensen de eersten Kuntakten knüppt to Plattdüütsche in Noordamerika.[1] Se hett siet disse Tied jümmer wedder de USA besöcht, dor Plattdüütsch-Ünnerricht geven un weer to de Düütsch-amerikaanschen Plattdüütsch-Konferenzen.[1] Disse Konferenzen, de al twee Johr in Sleswig-Holsteen un de annern Johren in de USA sünd, deit se sietdem ok mit planen.[1]

För de Reeg Niederdeutsche Formenlehre von’n Sleswig-Holsteenschen Heimatbund hett se de Bänn 2 bet 4 tohoopstellt, över dat Plattdüütsche in Sleswig, Noordfreesland un Dithmarschen. Dor hett se siet 2004 an arbeidt.[1]

Jensen weer Lektor för de Böker von Heinrich Ohm, de in’n Plaggenhauer-Verlag rutkamen sünd (De Mohls, Dat Licht, Dat sind doch Juden).[1] Bi’n Romaan Heine Steenhagen wöll ju dat wiesen!, den Friedrich Ernst Peters al 1925 schreven hett un de eerst 2012 rutkamen is, hett se dat Lektorat för den plattdüütschen Deel von dat Book maakt.[7] Se gifft Plattdüütsch-Kurse an de Volkshoogschool.[1] In’n Februar 2011 hett Jensen den Plattdüütschen Stammdisch in’t Kulturcafe von de Volkshoogschool in Flensborg grünnt.[1]

In de Dagbläder von’n Sleswig-Holsteenschen Zeitungsverlag hett se de Kolumne Gedanken över plattdüütsche Wöör.[3]

2013 hett se för ehr Levenswark den plattdüütschen Literaturpries Dat grote P von’n Fördervereen von dat Plattdüütsche Zentrum in Leck kregen.[3]

Warken[ännern | Bornkood ännern]

  • So schnacken wi twischen Flensburg un Schleswig. Niederdeutsche Formenlehre. Heft II, Plaggenhauer-Verlag, Krummbek 2007, ISBN 978-3-937949-08-6
  • So schnacken wi in Nordfreesland. Niederdeutsche Formenlehre. Heft III, Plaggenhauer-Verlag, Buxthu 2009, ISBN 978-3-937949-12-3
  • So schnack wi in Dithmarschen. Niederdeutsche Formenlehre. Heft IV, Plaggenhauer-Verlag, Buxthu 2011, ISBN 978-3-937949-16-1
  • Plattdüütsch leevt. Gedanken över plattdüütsche Wöör. Husum Druck- und Verlagsgesellschaft, Husum 2012, ISBN 978-3-89876-597-8
  • Dit un dat besnackt op Platt. Husum Druck- und Verlagsgesellschaft, Husum 2013, ISBN 978-3-89876-664-7

Footnoten[ännern | Bornkood ännern]

  1. a b c d e f g h i j k l m Dat bin ik. op plattduetsch-in-flensburg.de
  2. http://ethikkommissionen.aeksh.de/download/SHAE_20100446_Geburtstage_Verstorbene_1.pdf
  3. a b c http://www.shz.de/lokales/flensburger-tageblatt/platt-oscar-fuer-annemarie-jensen-id3269341.html Platt-Oscar für Annemarie Jensen]. Flensburger Tageblatt 10. Juni 2013
  4. http://link.springer.com/article/10.1007%2FBF00384600
  5. http://www.uni-kiel.de/journals/servlets/MCRFileNodeServlet/jportal_derivate_00000627/SS1974.pdf
  6. http://www.plattduetsch-in-flensburg.de/impressum.htm
  7. Literarischer Schatz kommt ans Licht. Schleswig-Holsteinische Landeszeitung, 21. November 2012

Weblenken[ännern | Bornkood ännern]