Anatomie (Film)

Vun Wikipedia
Filmdaten
Plattdüütsch Titel:
Originaltitel: Anatomie
Düütsch Titel: Anatomie
Produkschoonsland: Düütschland
Johr vun’t Rutkamen: 2000
Läng: 103 Minuten
Originalspraak: Düütsch
Öllersfreegaav in Düütschland: FSK 16
Filmkru
Speelbaas: Stefan Ruzowitzky
Dreihbook: Stefan Ruzowitzky
Produkschoon: Jakob Claussen
Musik: Marius Ruhland
Kamera: Peter von Haller
Snitt: Ueli Christen
Szenenbild: Ingrid Henn
Kledaasch: Nicole Fischnaller
Dorstellers

Anatomie is de Titel vun en düütschen Psychothriller ut dat Johr 2000, de in’t medizinische Ümfeld spelen deit. Speelbaas weer de öösterrieksche Stefan Ruzowitzky, de ok sülvst dat Dreihbook schreven hett. In de Hööftrull speel Franka Potente en Medizinstudentsche. Mit Anatomie 2 is 2003 en tweeten Deel rutkamen.

Inholt[ännern | Bornkood ännern]

De ehrgiezige Müncher Medizinstudentsche Paula beleggt en Anatomie-Sommerkurs bi den hoochachten Professer Grombek an de Universität Heidelbarg. Op den Weg dorhen dröpt se in’n Tog Gretchen, de den sülven Kurs besöken will. Op de Fohrt kummt dat to en Twüschenfall, as en junger Mann op eenmol na en Hartanfall tosamenbreken deit. Paula wohrt de Översicht un kann em dör Hart-Lungen-Wedderbeleven redden. Man, as Paula ehr eerste Liek ünnersöken schall kann se kuum glöven, dat vör ehr de junge Mann liggen deit, den se in’n Tog noch wedderbeleevt hett. Se blifft aver professchonell un maakt ehr patholoogsche Ünnersöken toenn. Dorbi fallt ehr op, dat sien Blood unnatürlich dick is. En Analys wiest den cheemschen Stoff „Promidal“ na, de to’n Präpareren vun Deerten bruukt weer, üm jem uttodrögen, intwüschen aver verboden is.

Paula bekiekt noch mal de Liek un finnt se en Tätoweren mit de Bookstaven AAA!, wat ehr toeerst nix seggt. Ehr Mitstudent Caspar bringt ehr op de Spoor vun en olle Geheemloge ut Studenten un Dokters, de sik Antihippokraten nöömt un sik nich an den Eed vun Hippokrates hoolt. Bi jemehr Streven na medizinsch Utforschen laat se sik nich vun ethische Bedenken stören. De Middelpunkt vun de Antihippokraten is de Universität Heidelbarg, wat Paula in grote Gefohr bringt. Dat hollt ehr aver nich dorvun af wieter to forschen. Kort later sünd Gretchen un de ehr ne’e Fründ verswunnen, wiel er Ex-Fründ Hein anfangt sik snaaksch optoföhren. Paula löpt vör em weg in Grombek sien Büro, woneem se ok dat Teken vun de Antihippokraten sütt. Vun den Professer warrt se gewohr, dat ok ehr Grootvadder inst to de Loge höört hett un sogor Grootmeester weer.

Bi en Versammeln vun de Antihippokraten warrt liekers beslaten, dat Hein sik för de Moorden verantwoorten mutt. Grombek will as sien Utbiller sülvst na de Polizei gahn. He aver vörher vun Hein an de Siet maakt. An Grombek sien Döör finnt Paula en verkehrte Naricht, dat se in’n Anatomie-Saal kamen schall. Den Avend dorvör dröpt se sik aver noch mit ehrn Fründ Caspar, mit den se in’t Bett lannt. In sien Baadstuuv finnt se aver denn en lütte Buddel Promidal un op sien Schrievdisch leegt Dokumenten mit dat AAA-Teken. In den Gloven, dat ok Caspar to de Antihippokraten tellt löpt se weg na’n Anatomie-Saal. Man dor finnt se de plastineerte Liek vun Gretchen un Hein, de togifft, dat he de Studenten ümbröcht hett. He binnt Paula op’n OP-Disch fast un sprütt ehr Promidal. As he ut’n Saal geiht, kummt Caspar rin, binnt ehr loos un sprütt ehr wat gegen dat Gift.

Vördem se utrieten künnt, warrt se vun Hein un Ludwig – den Mitbewahner vun Caspar, den ok dat Promidal höört – överrascht. Hein geiht op Caspar – de in Wohrheit Oliver heet un as Geschichtsstudent blots de Antihippokraten utforschen wull – daal un fangt an, em apentosnieden, wiel Paula Ludwig mit en Injekschoon Promidal afwehren kann. Na en dramaatsche Verfolgungsjagd dör de Anatomie kann se Hein afwehren un doodmaken. Ok Oliver kann opletzt reddt warrn.

Kritik[ännern | Bornkood ännern]

  • Dat Lexikon vun’n internatschonalen Film schreev den Film en raffineerten technischen Insatz vun de formalen Middels to. Man de Film de veel vun sien suggestiven Wirken verleren, vunwegen dat he sik nich tofreden geev mit de Bild- un Denkorden vun dat Genre, man en geistigen ‚Överbo‘ bemöhn de, de jüst so platt as opsett wirken deit.[1]
  • Katja Nicodemus oordeel in de taz, dat de Öösterrieker Ruzowitzky mit sien Alpendrama Die Siebtelbauern de gliektietige Subversion un Ümschrieven vun’t Genre Heimatfilm hinkregen harr. In Anatomie nu övernehm he reakschonäre amerikaansche Schockerklischees, ahn jem to breken oder ok blots dormit to spelen.[2]

Utteken[ännern | Bornkood ännern]

De Film is ok internatschonal op’n Markt bröcht worrn. He weer vör veer Filmpriesen vörslahn, vun de he dree wunnen hett:

Wieter weer he in’t Johr 2000 ok mit den DVD Champion in de Kategorie Speelfilm uttekent

Achtergrund[ännern | Bornkood ännern]

De in den Film nöömte cheemsche Stoff Promidal as ok de Verbinnen vun de Antihippokraten gifft dat nich wohrhaftig, man sünd rein utdacht.

De Hööftdorstellers weern ünner annern mit den Dokumentarfilm Tisch No. 6 (vun de Speelbaas’sche Carola Nëlle Hauck, 1998) op jemehr Rullen vörbereidt. De Film wiest, woans Mediziners wiel dat Studium in’n Rahmen vun de Präpareerkursen jemehr Scho afleggt. Ruzowitzky hett em butendem to’n Lehren vun de medizinischen Grundlagen bruukt.

Mit mehr as twee Millionen Tokiekers in Düütschland[3] harr Stefan Ruzowitzky sien gröttsten kommerziellen Spood. Bito weer Anatomie ok de spoodriekste düütsche Film vun’t Johr 2000.

Borns[ännern | Bornkood ännern]

  1. Kritik to Anatomie in’t Lexikon vun’n internatschonalen Film, afropen an’n 22. März 2014
  2. „Roben und Runen im Kerzenschein“, taz an’n 3. Februar 2000
  3. Lumiere – Datenbank to Filmbesökertallen in Europa

Weblenken[ännern | Bornkood ännern]