Alvise Cadamosto

Vun Wikipedia
Wesseln na: Navigatschoon, Söök

Alvise Cadamosto (* üm 1432 in Venedig; † 18. Juli 1488 in Rovigo), ok Ca’ da Mosto nöömt, weer en italieenschen Seefohrer un Opdecker, de in’n Deenst vun den portugeeschen Infanten Hinrich de Seefohrer stünn. In de Literatur warrt mitünner ok 1487 un 1510 as dat Johr angeven, in dat he dood bleven is.

Levensloop[ännern | Bornkood ännern]

Cadamosto weer boren as de Söhn vun den Feernkoopmann Giovanni da Mosto un is in dat Gewarf vun sien Vadder mitinstegen. Wegen verschedene Verstöten is sien Vadder aver ut Venedig utwiest worrn un bedreev sien Gewarf in’t Utland. As Koopmann un Seefohrer hett Cadamosto dat Middelmeer bereist as ok den Atlantik vun Alexandria bit Flannern.

In dat Johr 1454 müss Cadamosto wiel en Reis na Flannern in de Neeg vun’t Kap São Vicente an de portugeeschen Küst sien Fohrt ünnerbreken, vun wegen dat en gresigen Storm toven de. An de Algarve güng he an Land un hett as eerste Seefohrer un Koopmann en Anbott, in den Deenst vun Hinrich den Seefohrer to gahn. He hett de Mööglichkeit wohrnahmen un bleev in Portugal.

Mit en Karavell vun 45 Tünnen is he an’n 22. März 1455 to sien eerste Fohrt in’n Deenst vun de Portugesen opbroken. Över Madeira un Cabo Branco is he bit in dat Rebeet vun de Senegal-Münnen kamen. Wieter op süüdlichen Kurs drööp he op twee portugeesche Scheep, de ünner dat Regeer vun Antoniotto Usodimare stünnen, en Genuesen, de ok in’n Hinrich sien Deensten stünnen. Se hebbt tohopen versöcht, op’n Gambia-Stroom wieter in’t Binnere vun’t Land to kamen, sünd dorbi aver an’n Wedderstand vun de Inheimischen hangen bleven.

Hinrich hett Cadamosto in’t Johr dorop den Opdrag geven, mit dat Utkundschoppen vun’t Münnenrebeet vun’n Gambia-Stroom wieter to maken. In’n Mai 1456 is he vun’n Haven vun Lagos ut losföhrt. Op Kurs Süüdwest hett he dorbi mehrere Eilannen vun Kap Verde opdeckt: de beiden ööstlichen Eilannen Boa Vista un Maio as ok dat Hööfteiland Santiago. De Eilannen weern to de Tiet noch nich bewahnt. Na en korten Afsteker na Boa Vista is he denn wieter seilt na’n Gambia-Stroom, den he dit mol ruchweg 100  km wiet stroomopwärts befohren hett. He künn mit de Inwahners en Hannelskuntakt herstellen (Goldstoff, Slaven). Man, ünner de Mannschop sünd swore Feverkrankheiten utbroken, an de ungefähr en Drüddel vun de Seelüüd doodbleven sünd. Cadamosto weer dordör dwungen noch 1456 sien Reis aftobreken un torüch na Portugal to seilen. Na sien Berichten vun de nee opdeckten Eilannen is de Genuees Antonio da Noli mit en wietere Utkundschoppen vun de Kapverdischen Eilannen beopdraagt worrn.

Cadamosto is dorna wietere söven Johren in Portugal bleven, güng dorna denn aver na Venedig torüch. He nehm dor aktiv an de Politik vun de Stadt deel un hett den Hannel vun sien Familie wieterföhrt.

Cadamosto weer de eenzige Seefohrer in den Deenst vun Hinrich den Seefohrer, de schriftliche Berichten över sien Fohrten maakt hett. In disse Berichten vun de Johren 1464 un 1465 is ok de eerste europääsche Beschrieven in vun dat bekannte Steernbild vun’n Süüdhimmel, dat Krüüz. He beschreev dorin sien beobachten över de Geografie, de Inwahners un de weertschopplichen Tostännen vun de afrikaanschen Rebeden. He schreev aver ok över en Reis vun Pedro da Sinta na de westafrikaansche Küst. Sien Berichten weern Anfang vun’t 16. Johrhunnert to’n eersten mol in Basel ünner den Titel Novis Orbis. Navigatio ad terras ignotas Aloysii Cadamosti publizeert.

Weblenken[ännern | Bornkood ännern]