Aluguer

Sammelsteed för Aluguer-Sammeltaxis op São Vicente.

Aluguer (kreol. Woort för „to meden“) is op de Eilannen vun Kap Verde en Beteken för de dor faken vörkamenden Sammeltaxis. Disse Sammeltaxen övernehmt meist den helen Transport vun de Lüüd op de Eilannen, wiel dat sünners op de lütteren Eilanenn kuum regelmatige Busverbinnen gifft. Tomeist sünd disse Fohrtüüch Lüttbussen för bit to teihn Mitfohrers oder apene Autos mit Bänk op en apene Ladeflach (Pickups oder Pritschenwagen).

De Aluguer-Autos hebbt faken faste Sammelsteden, wo se op Mitfohrers töövt. Wenn noog Lüüd tohopenkamen sünd, föhrt se los. Dorbi bedeent se tomeist faste Strecken, künnt ünnerwegens aver an jeder Steed anhollen warrn. De Fohrpries is för en Fohrt fastleggt. Dorbi speelt dat faken keen Rull, wo wiet een mitföhrt. Vergleken mit en normal Taxi sünd de Aluguer-Autos günstiger, dorför kann dat aver vörkamen, dat een länger töven mutt, bit dat losgeiht, wenn t. B. noch nich noog Lüüd tosamenkamen sünd. Mitünner is dat ok möglich, en Aluguer-Auto för komplette Privatfohrten to meden. In so en Fall warrt vörher en Pries uthannelt.