Alma Reville

Vun Wikipedia
Wesseln na: Navigatschoon, Söök

Alma Lucy Reville, later verheiraat as Alma Hitchcock (* 14. August 1899 in Nottingham; † 6. Juli 1982 in Bel Air, Kalifornien) weer en brittsche Cuttersche un Dreihbookschrieversche, de von 1926 bit to sien Dood 1980 de Ehfro vun den Speelbaas Alfred Hitchcock weer un veel mit em tosamen arbeit hett.

Leven un Wark[ännern | Bornkood ännern]

Alma Reville weer al mit sössteihn Johren as Helpersche bi’n Snitt to’n Film kamen. As se 1921 to’n eersten mol mit Alfred Hitchcock tosamendrapen is, harr se al eenige Insichten as Cuttersche un hett tosätzlich ok as Skriptdeern arbeit. HItchcock hett dormols in’t glieke Studio arbeit as se. Ahn sik dorbi direkt to drapen harrn se ok vörher al deelwies an de glieken Filmen arbeit, vördem Hitchcock ehr as Cuttersche un SKriptdeern för den Film Woman to Woman (dt. Weib gegen Weib) vun 1923 vermiddelt harr. He sülvst harr dorför dat Dreihbook schreven. orna hebbt se sik ok privat kennen lehrt un sünd enn en Poor worrn. 1923 hebbt se sik verlööft un dree Johren later heiraat. In’t Johr 1928 is jemehr Dochter Patricia boren worrn.

Reville harr vör jemehr Tosamendrapen mehr Spood as Hitchcock, de dormols noch nich bekannt weer. Se hett toeerst wieter för den Produzent Michael Balcon arbeit, för den Hitchcock ok vele Filmen dreiht hett. Bit in de 1930er Johren hett Reville unafhangig vun ehrn Ehmann Dreihböker schreven. Gliektietig is se fast Liddmaat in Hitchcock sien Filmkru worrn, hett an sien Dreihböker mitarbeit un bi de Dreiharbeiden holpen.

Tosamen mit ehrn Ehmann un ehr ochter is se 1939 in de USA utwannert, woneem Hitchcock en Anbott för sien wietere Loopbahn in Hollywood annahmen harr. Dor is se bit an’t Enn vun ehr Leven bleven. Reville hett 1950 de US-amerikaansche Staatsbörgerschop annahmen.

Bi de amerikaanschen Filmen vun ehrn Mann ut de 1940er Johren weer Reville blots noch in enkelte Fäll in en offizielle Funkschoon bedeeligt. Vun de 1950er Johren an weer se in keen Vörspann mehr opföhrt. Liekers gell se wieter as de wichtigste Beraaderssche vun Alfred Hitchcock. Se hett wieter bi de Dreiharbeiten holpen un weer an’t Schrieven un Beoordelen vun Dreihböker bedeeligt oder pass sogor op’n Snitt op. Se schall to’n Bispeel de Auto-Verfolgungsjagd för den Film To Catch a Thief (dt. Über den Dächern von Nizza) utklamüstert hebben. Butendem schall se kort na’t Fardigwarrn vun en Film Psycho as eenzige markt hebben, dat Janet Leigh as Liek an’t Enn vun de beropene Szeen mit den Moord ünner de Bruus noch sluken de.

As se öller weer, weer Reville as aktive Helpersche vun ehrn Ehmann bi de Dreiharbeiden jümmer weniger togegen, vunwegen dat se Lasten mit ehr Gesundheit kreeg. 1958 is bi ehr Bostkrebs faststellt worrn un 1971 harr se en Slaganfall. Se hett sik aver na beide Saken wedder berappelt un hett ehrn Ehmann opletzt üm twee Johren överleevt. As Hitchcock den AFI Lifetime Award kregen hett, hett he blots sien Fro Dank seggt – dat aver gliek veermol: as Dreihbookschrieversche, as Cuttersche, as Mudder vun jemehr Dochter un as Kööksch.

Filmografie (Utwahl)[ännern | Bornkood ännern]

Johr Titel Funkschoon
1923 Woman to Woman
dt.: Weib gegen Weib
Snitt
Wieterföhren
1925 The Pleasure Garden
dt.: Irrgarten der Leidenschaft
Regiehelp
Snitt
Wieterföhren
1928 The Constant Nymph
dt.: Die treue Nymphe
Dreihbook
1929 After the Verdict
dt.: Die Siegerin
Dreihbook
1929 The Romance of Seville Dreihbook
1931 Mary Dreihbook
1931 Sally in Our Alley Dreihbook
1931 Rich and Strange
dt.: Endlich sind wir reich
Dreihbook
1932 Number Seventeen
dt.: Nummer Siebzehn
Dreihbook
1934 Forbidden Territory Dreihbook
1936 Secret Agent
dt.: Geheimagent
Dreihbook
1941 Suspicion
dt.: Verdacht
Dreihbook
1943 Shadow of a Doubt
dt.: Im Schatten des Zweifels
Dreihbook
1947 The Paradine Case
dt.: Der Fall Paradin
Dreihbook
1950 Stage Fright
dt.: Die rote Lola
Dreihbook

Weblenken[ännern | Bornkood ännern]