Alexander de Grote

Vun Wikipedia
Wesseln na: Navigatschoon, Söök
Alexander de Grote; hellenistisch, 2. bit 1. Johrhundert v. Chr., greeksch Marmor

Alexander de Grote (Ἀλέξανδρος ὁ Μέγας Aléxandros ho Mégas), anners Alexander III. vun Makedonien (* 20. Juli 356 v. Chr. in Pella; † 10. Juni 323 v. Chr. in Babylon) weer vun 336 v. Chr. bit to sienen Dood König vun Makedonien un Baas vun den Bund vun Korinth. Alexander sien Vadder Philipp II. harr ut den vörmols nich sunnerlich groten Staat Makedonien un en Reeg vun greeksche Poleis en dannig Riek maakt. Alexander hett de Grenzen vun düt Riek noch mol unbannig wiet rut schaven, as he up den so nömmten Alexandertog dat Perserriek erover un bit na Indien henkamen dö. Nadem he in Ägypten inmarscheert weer, is he dor as Pharao ankeken wurrn.

He hett allerhand grote Slachten un Kriege wunnen. Vundeswegen harrn de Lüde dat dor al ummer up afsehn, em in Literatur un Kunst af to billen un sik mit em ut’neen to setten. Al in de Tieden vun de Antike, un noch in de hüdige Wetenschop vun de Historie könnt de Lüde dor avers nich overeen kamen, wat se vun Alexander to holen hefft.

As he up den Throon stiegen dö, fung dat Tiedoller vun den Hellenismus an. Den sien Kennteken is unner annern de Stempel vun greeksche Kultur un Spraak, de all annern Länner un Völker updrückt wurrn is. Düsse Kultur-Traditionen vun den Hellenismus gungen fudder, as de greeksche Welt al lang tohopensackt weer un hefft noch Johrhunnerte lang leevt in dat Röömsche Riek un dat Riek vun Byzanz.