Abayudaya

Vun Wikipedia
Wesseln na: Navigatschoon, Söök

De Abayudaya (Kinner vun Judah) sünd en Gemeenschop vun swartafrikaansche Juden, de in Uganda an’n Foot vun’n Barg Elgon leevt. De 750 Liddmaten wahnt in de Regionen in Nabugoya bi Mbale un Pallisa. De jüüdsche Gemeen hett sik unafhangig vun de Falascha in Äthiopien billt. De Krieger Semei Kakungulu, de ünner britisch Regeer toeerst den protestantschen Glöven annahmen harr, befaat sik, nadem he vun de Briten nix mehr weten wull, mit den Glöven vun de christliche Gemeenschop vun de Abamalaki, de jüüdsche Elementen in ehren Glöven opnahmen harr. Dat Judendom faszineer Kakungulu so, dat he 1919 vun de Abamalaki Afstand nehm un sik nu to’n Juud verkloor. He sammel Glövensbröder üm sik, mit de he bi Mbale siedel. Eerst 1926, as de Gemeen dat eerste Maal Kuntakt to en witten Juud harr, de welke Tiet bi de Gemeen bleev un ehr de jüüdschen Ritualen lehr, legen se den Glöven an Jesus Christus kumplett af.

To de Tiet vun den Diktater Idi Amin hebbt se de Abayudaya verfolgt, so dat vun de3.000 Personen to de Tiet vele den Dood funnen hebbt un de ganzen 30 Synagogen un de hilligen Böker tonicht maakt wörrn.

Eerst 2002 hett de jüüdsche Weltgemeen de Abayudaya deelwies as „echte“ Juden gellen laten, as in ene Zeremonie mehr as 400 Liddmaten vun de Gemeen to’n Judendom konverteren. De Gemeen hett hüüt fief Synagogen.