aXXo

aXXo is dat Internett-Alias von en nich wieder kennt Person, de in de Tied von November 2005 bet to’n 11. März 2009 en ganze Reeg DVD-Films as Torrents illegal in’t Internett stellt hett, dat elkeen de Datein dalladen un mit annere uttuuschen kann.

aXXo sien Datein hebbt jümmer bi 700 MB, dat se jüst op en CD roppasst, en eenheitlich Dateiformat (MPEG-4 ASP) un een in’n Vergliek gode Qualität. Dorüm bruukt Filesharers över to’n Bispeel BitTorrent temlich geern aXXo sien Datein. Eric Garland, Baas von BigChampagne, hett seggt, dat sien Firma funnen hett, dat 33,5 % von de Films, de över Tuuschbörsen uttuuscht warrt, von aXXo weren. Disse gode Roop warrt faken von annere Filesharers utbüüt, de aXXo sien Naam för Datein bruukt, de nich von em sünd, dat mehr Lüüd jem dallaadt.

aXXo is toeerst in’n November 2005 bi dat Message Board Darkside_RG opdükert. Von’n 11. November 2007 bet to’n 9. März 2008 weer he nich aktiv. In’n Dezember 2008 weer he bi 1000 illegal wiedergeven Films anlangt. Den letzten Film hett he an’n 11. März 2009 hooglaadt. Dat letzte Teken von em weer en Kommentar op Darkside_RG an’n 19. April 2009. Sietdem is he nich mehr aktiv wesen.