666 (Okkultismus)

Vun Wikipedia
Wesseln na: Navigatschoon, Söök

De Tahl 666, ok Tahl vun dat Beest, is en Tahl, de in dat leste Book vun dat Nee Testament, in de Openbarung vun Johannes in Kapitel 13 Vers 18 nömmt warrt. Se schall dor up den Antichristen henwiesen. In de Openbarung warrt vertellt, dat Johannes in en Vischoon dat Beest ut de See un dat Beest ut de Eer to sehn kriggt. Över dat leste steiht in dat Book to lesen:

Hier is Wiesheit fraagt; keen Verstand hett, de schall mal de Tall vun dat Deert utreken. Dat is nämli en minschlich Tall, se heet sößhunnertsößunsößtig". (Na Karl-Emil Schade siene Översetten).

In hüdige Översetten is de Tahl also 666, man dat gifft ok en Reeg vun ole Texten un Fragmenten (unner annern de Papyrus P 115), de hefft annere Tahlen, as 616 oder 656.

Wat de Tahl bedüden schall[ännern | Bornkood ännern]

Tahlen un Bookstaven[ännern | Bornkood ännern]

De Naam vun Nero un de 666

De Röömschen Tahlen weert dör Bookstaven utdrückt. Verscheden Bookstaven staht för Tahlen. De Tahl 666 kümmt tostanne, wenn een all Bookstaven, de Tahlen bedüden doot, man ohn dat M (1000), eenfach achternanner stellt vun hooch na leeg. Dor kümmt denn DCLXVI bi rut (D = 500, C = 100, L = 50, X = 10, V = 5, I = 1). Wenn nu just düsse Bookstaven in den Naam vun en Minschen vörkamen doot, denn so kann dat as en Henwies nahmen weern, dat düsse Minsch de Antichrist is.

Just so, as mit Latiensche Bookstaven geiht dat ok mit Bookstaven in annere Schriften, de Tahlen bedüden doot, so, as in de Hebrääsche Spraken. Veel vun düsse „wetenschopplichen“ Kunststücken könnt as Komplotttheorien bi Siet stellt weern. En paar Bispelen:

Nero[ännern | Bornkood ännern]

Faken is dacht wurrn, de Tahl 666 weer en Teken för den röömschen Kaiser Nero. He is as en afsunnerlichen quaden Minssen ankeken wurrn, vunwegen dat he so böös achter de Christen ran weer. Wenn sien Naam greeksch utspraken warrt, denn so kümmt dor Neronkesar bi rut. Ümsett in hebrääsche Bookstaven gifft dat den Tahlweert 666 (kiek bi dat Bild).

Domitianus[ännern | Bornkood ännern]

Ok de Kaiser Domitianus warrt nömmt. De Tahl 666, in röömsche Tahlen DCLXVI, schall bedüden: Domitianus Caesar Legatos Xti Violenter Interfecit (Kaiser Domitianus hett de Anhängers vun Christus mit Gewalt dootmaakt). Ok Domitian weer bekannt dorför, dat he Christenlüde verfolgen un an'e Siet bringen dö.

Annere Theorien[ännern | Bornkood ännern]

De latiensche Titel vicarius filii dei (up Platt: „Stellvertreder vun Gott sien Söhn“) gifft tohopentellt ok de Tahl. Dat is nu just en Titel vun den röömsch-kathoolschen Paavst. Anner meent ok, dat achter de Tahl vun dat Beest de Streepkood steken deit. Vunwegen dat de Bookstaav „w“ up Hebrääsch (Waw) den Tahlenweert vun sess hett, warrt ok seggt, dat Beest un de Antichrist, dat weer dat worldwide web (www).

666 vun de Tahl 6 ut verstahn[ännern | Bornkood ännern]

De Tahl 6 warrt in de Bibel in Tosamenhang bröcht mit de Fienden vun Jehovah. En Philister, de to de Rephaiten tohören dö, weer „unbannig boot“ un siene „Fingers un Töhn (weern) sess vun Tahl“ (1. Krönk 20,6). König Nebukadnezar hett en gollen Bild vun 6 Ellen Breete un 60 Ellen Hööchte upstellen laten. Dor schollen all Amtsdrägers vun sien Land in een Gebeet vör tohopenkamen. As Gott siene Knechten dor nich bi mitmaken wollen, hett he jem in'n Füeraben smieten laten (Daniel 3,1-23). De Tahl sess is minner, as de Tahl seven. Seven is nu vun Gott sien Standpunkt ut bekeken, de Tahl, de för dat Gode un dat Allerbeste. Wenn nu dree mol achter'nanner de sess schreven warrt, denn schall dat woll en passlich Teken ween för dat, wat nich goot un vullkamen, man quaat un fehlerhaftig is.

Wo de Tahl en Rull spelen deit[ännern | Bornkood ännern]

Okkultismus[ännern | Bornkood ännern]

Sunnerlich wichtig is düsse Tahl in dat Denken vun den engelschen Grootmeester vun den Okkultismus, Aleister Crowley. He hett vun sik sülms seggt, he weer dat τὀ μέγα θήριον (to mega therion, dat is Ooltgreeksch un heet „dat grote Beest“) ut Johannes siene Openbarung. He hett Breven an siene Anhängers unnerschreven mit 666, de „Tahl vun dat Beest“. He hett ok seggt, he harr den Text vun sien Book Liber Al vel Legis dör en Openbarung kregen, nadem he sik 1904 in dat Ägyptische Museum in Kairo mit en Stele befaat harr, de in dat Inventar vun dat Museum unner de Nr. 666 inschreven weer.

666 in de Musik[ännern | Bornkood ännern]

En sunnerlich grote Rull speelt de 666 in de Subkultur vun de Heavy-Metal-Musik, un dor to'n Deel in'n Death Metal, besunners avers in'n Black Metal. Al 1982 hett de Band Iron Maiden ehr Album The Number of the Beast rutbröcht. Ok up dat Album Metal on Metal vun Anvil ut datsülvige Johr speelt de Tahl en grote Rull. Al 1972 harr de Progressive-Band Aphrodite's Child ut Grekenland en Dubbelalbum mit Musik vun Vangelis rutbröcht unner den Titel 666. Dor güng dat üm de Openbarung vun Johannes bi. Ok in jüngere Tied warrt de Tahl vun Musikers bruukt. De Band HIM hett en EP rutbröcht mit den Titel 666 Ways to Love un hett dat Leed Your Sweet Six Six Six up ehren Album Greatest Lovesongs Vol. 666 speelt. An'n 6. Juni 2006 hett de US-amerikaansche Thrash-Metal-Band Slayer de Single Cult ut ehr Album Christ Illusion rutbröcht. Up den sien Cover weer en tohopenneihten Jesus Christus to sehn mit de Tahl 666 up siene Bost. Ok de Alternative-Rock-Band Billy Talent hett 2007 en Livealbum unner den Titel 666 rutbröcht.

Maleree[ännern | Bornkood ännern]

In en Teknung vun Keith Haring över de Apokalypse is de 666 dat Kennteken vun en Deert mit Höörn, wat de Welt in Dutt maken will. In de ene Hand höllt dat en Dollarteken, in de annern ene Raketen.

6. Juni 2006[ännern | Bornkood ännern]

An'n 6. Juni 2006 (6.6.6) sünd en Reeg vun Christenlüde ut sunnerliche Sekten tohopenkamen un hefft dor üm beedt, dat Gott dat Quade afwennen müch an düssen Dag. An düssen Dag hett ok de Speelfilm The Omen 666 siene Premiere harrt. Dor geiht dat in över den Antichristen siene Geboort an'n 6. Juni 2006.

Weblenken[ännern | Bornkood ännern]