Ägaadsch Eilannen

Vun Wikipedia
Wesseln na: Navigatschoon, Söök
Laag vun de Ägaadschen Eilannen in’t Middelmeer

De Ägaadschen Eilannen (italieensch: Isole Egadi), de in de Antike „Aegates“ nöömt weern, sünd en lütte Inselgrupp in’t Middelmeer vör de Westküst vun Sizilien. Se leegt ruchweg op de Hööch vun de Hafenstadt Trapani un höört to Italien.

De Inselgrupp besteiht vör allen ut de dree groden Eilannen Favignana, Levanzo un Marettimo. Dorto kamt en poor lüttere Eilannen, as to’n Bispeel Formica un Maraone. Tosamen hebbt de Eilannen en Landflach vun 37,45 km².

De Eilannen weern in vörhistoorsche Tieten noch mit dat Fastland verbunnen un dorüm ok bewahnt. Op Levanzo gifft dat in de Grotta del Genovese Malereen un Ritzteken, de ut de Ollen Steentiet överduert hebbt.

In de Antike in’t Johr 241 v. Chr. hebbt bi de Ägaadschen Eilannen de letzten Seeslachten twüschen de Flotten vun Karthago un de Röömsche Republiek in’n Eersten Punischen Krieg stattfunnen. De güngen mit’n Sieg vun de Römers över de Kathager to Enn un hebbt togliek ok dat Enn vun’n Eersten Punischen krieg bedüüdt.

Vundaag billt de Eilannen tohopen de Gemeen Favignana, de to de Provinz Trapani höört.